Ra cittara zeneize 1636/Ra muza zeneize

Da Wikivivàgna
Ra cittara zeneize de Gian Giacomo Cavallo
Ne l'incoonaçion de Gian Steva Doia (1633)
Zena, Gioxeppe Pavon, 1636
In corscivo e ligatue. Gh'amanca i acenti aguççi.
[p. 161 modifica]
RA MUZA
ZENEIZE

NELL'INCORONATION
DRO SERENISSIMO
GIAN STEVA
DORIA

DUXE DRA REPUBRICA
DE ZENA.

1.
Da ro rammo, ond'appeiza
Pende in Parnazo straccqua e desguenia
Ra Lira, che v’hò reiza,
Muze, zà da ri agni fastidia,
Vuoi, ch'à ro son de muxica armonia,
Superando atri bronchi,
Forza avei de da vitta anco à ri tronchi,
Oura che d'ogn'intorno pe ri ære

[p. 162 modifica]

Abbarlughæ da questa noeva luxe,
Gian Steva Doria Duxe
Zena cria per Duxe, e per sò poære,
Con destaccara, e rearmara intanto,
Muze, dæ noeva vitta à morto canto.

2.
Ma zà tutta corteize
Sento con un soave mormorío
Ra mæ Muza zeneize
Fame com'all'oreggia un caro invio;
Sciù sciù dunca con pe pronto, e spedio
Per sì gran personaggio,
Muze, senza tarda, tutte à viaggio;
E come tenti oxelli in sciù ri venti,
Accordando à ri venti re battue,
Ogn'unna ro sarue
In concerto de voxe, e d'instromenti
Ma con vuoi vegne sopratutto à rollo
Ro vostro meistro de Capella Apollo.

3.
Per intesse Coronna,
Ch'à soggetto si grande se confasse,
Reginne d'eliconna,
Oura è tempo ch'ogn'unna se desbrasse

[p. 163 modifica]

Chi groppi hà de concetti ri desfasse;
Dagghe ogn'unna in caparro
Un concetto à sò gusto chiù bizarro.
Mì trà tanto che à sorte in queste rive
Dra vostra gratia com'à puinto in pegno,
Canzelle bench'indegno,
Officio, e cura aparte hò da servive,
In vost'hono cavandome ri guanti
Sarò tromba all'hono dri vostri canti.

4.
Muze, mà da che parte,
Sottomissa à tant’oebrigo ra penna,
Povera in tutto d'arte,
Comensera se Apollo nò l'impenna?
Sì sì rò favò vostro me l'accenna,
Zà de le come fuoera
Ra mente trasporta s'ingorfa, e svoera,
E zà battendo l'ære forestera
Onde ra Famma da per tutto in trombe
Fà che suoenne, e rimbombe
Dre grandezze dri Doria ogni Rivera,
Da Febo illumina, tosto repiggia
Re Glorie antighe de si gran Famiggia.

[p. 164 modifica]


5.
Mira pe re marinne
Dell'Africa chiù barbare, e remote
Aquile pellegrinne
Fase à ro Mondo da per tutto note;
Per coste, e chiaze à lo dro tutto ignote
Com'à frenna, e roziggio
Mette ogn'un con l'Imperio de l'artiggio;
A ro Lion ch'ogn'Annima spenaggia
Fa spesse votte strixella ra fronte;
D'Innemigo chi affronte,
Sæ chi se sæ nò reffua battaggia;
Trionfa; Impera; spande re are
Per Levante, e Ponente in mille care.

6.
Dri Lambe, dri Oberti,
Dri Pieri, dri Paghen, de quelli Andrie,
Per Gloria cosi erti;
Nassui per terro dre Barbarie;
In Patria sprezzatuoi dre Signorie;
Poæri dri Carli quinti;
In statua sublimæ per tanti cuinti;
De tent'atri, ch'in cimme de governi
Da re primme Coronne, e da ri Pappi
Stæti eletti per Cappi

[p. 165 modifica]

In mille parte se son fæti eterni
A mira in ogni secolo chiù vegio
Ri raggi registræ com'in un spegio.

7.
Mà che voxe d'intorno,
Muza, è quella chi pa ch'oura me ciamme?
Ch'à ro nostro contorno,
Con tirane l'oreggia, ne rechiamme?
Odi ch'apuinto in muoeo d'un chi esclamme
A dixe ch'avvertimmo,
Ch'à scorratta ri Mondi nuoi fallimmo;
Che mentre à Zena unna chiassa Doria
Sens'atro lambiccase ro cervello,
A intaggio de scopello
Ne lezemmo in ri marmari l'istoria,
Indærno per Levante, o per Ponente
Peschemmo cos'havemmo da ra rente.

8.
Che da di tutte affæto
Re grandesse dri Doria ne manleva
L'origina retræto
Dro Duxe Serenissimo Gian Steva,
Onde ro So da che fuoi Adam, e Eva
In queste ò in atre bande

[p. 166 modifica]

Hommo nò vì per cortexia chiù grande,
De dentro armou de caritæ divinna;
Trà ri grendi grandissimo, e in sò stato
Basso quanto chiù ato,
Quanto chiù ricco come ra Marinna;
Bon, Giusto, Pio, da tutti benvossuo;
All'Imperio nò fæto, mà nassuo.

9.
Le con giusta baransa,
A ro Ricco, e à ro Povero prescrita
Giustitia, e Temperansa
Compartirà con mente e con man drita;
A nissun benche minimo interdita
Sarà ra sò prezensa;
A nissun denegou porta, e audiensa:
Le dra povera gente ro conforto;
Dri pupilli, e dre vidove recetto
Proveira con effetto
Che à nissun sæ pur un cavello torto;
C'haggie ognun, com'e giusto, ro sò drito;
D’ogn'un Porto, Refugio, e brassodrito.

10.
Canson, tanto ne baste; semmo à pego
L’anda chiù in là sarà stimou capricio,
Digghe ro resto Brignore, e l’Albricio.