Poesie drò Signò Giurian Rossi/Del Marinaro
| ←Introduttion de serta causa avanti il ser.mo Senato | Ro marinà de |
Ro Polleiroe→ |
| da-o manoscrito Ricci 177 do Comun de Zena, www.storiapatriagenova.it |
Mi per gratia de Dè son marinà
Si ho scorso ra mè parte pe ro Mondo
Serto m'intendo ben dro navegà
E in questa profession no me confondo
Me son fin delettòu de studià
Quante scapolle sè intro Mappamondo
Perche zà sentì dì da un servellazzo
Che lasciù dato perdan chì da basso
2.
E fù ch'ho da mi sempre procurou
Mette l'inzegno in oevera ogni giorno
Con meigo spesso m'ho miè frè menoù
Ch'è di boin marinè, che vagghe attorno
Chi ro visse da solo ro zioù
Moè chiù ro piggierè per caviorno
Si lesto e forte poe, che in tro muà
Ri amanti o tira sciù fin à baxià
3.
Liè ra scotta da meistro sà cazzà,
E à Veire, e à Reme a lavorà l'e bon
E per poei drito, e presto in Porto intrà
Senza fà biscia, o ten ben ro Timon
Mi intra Busciora possò studià
E ben con ro compasso staggo in ton
Liè se serve dra man, mi dro servello
E in sto moeo ro Cottà batte a livello.
4.
In somma ro savei con l'arte vera
De questa profession ch'usemo noì
No è cosa si facile, e leggiera
Com'andè imaginando foscia voì
Ogn'un sà barchezà pe ra Riviera
Ma all'ingorfase poè gh'è dri doroì
Mostra lantò virtù, se fa varei
Quando ro mà chiù grosso a tutto poei.
5.
Quanto chiù ro mà turba ra Tempesta
E un maroso con l'atro se confonde
Zero ra Nave in quella parte, e in questa
Per poira ch'o no gh'intre da re sponde
Lantò chiù ra virtù se manifesta
E perche ra ventura n'arrionde
Houra piggiando, houra mollando l'orza
Femo da noì maraveggiosa forza
6.
E ro dindan chi fa mescià ro mà ra Nave
Quanto chiù ra remenna ra corrente
L'hemo noì per piaxei doze, e soave
Ni o n'inversa ro stoemago, ò ra mente
E quanto chiù pà, che ro mà ne brave
Piggiemo in man re corde prontamente
Per esse lesti à carregare quando
Fasse bezoegno, ò de mollare in bando
7.
L'è vei che chiù contento o se retroeva
Un marinà ch'e pratico, e varente
Trovase sotta unna Navetta noeva
Quando de navegà voeggia o se sente
Che lantò dell'inzegno se fa proeva
E bezoegna intre l'arte esse levente
Che no sacciando ancon ra so natura
O navega (poè dise) a ra ventura
8.
Quando hemmo sotta un bon massiscio legno
Sodo, rezente, e fito intre l'andà
Mettemmo drito ro Timon a ro segno
Là onde infin havemo da Navegà
E quanto poè caccià senza retegno
Femmo ra veira meistra carregà
E fassando in ro mà squarzi soavi
Femmo un camin, che manco ri Diavi.
9
Per ogni vento navegà savmmo
E semmo in questo d'ogni cosa esperti
Scandaggio così longo poescia havemo
Chi ne fa presto d'ogni fondo serti
Ni pe ro storbio moè se spaventemo
Onde son per vanzà fondi inserti
Che s'unna votta ro cacciemo dentro
Tant'o va in zù che va à trovà ro sentro
10
Ma ro cacciaro in Pellago profondo
Non è miga mestè de bon Pilotto
Che ben se sà che no gh[']è fin, ne fondo
Ne o se ghe poè trovà votto, e revotto
Usaro dè ro Marinà secondo
Che davanti o se vè ro Mà derrotto
Rente ri Porti, in quarche loego streito
Perche ro fondo lì gh'e chiù restreito.
11
E l'è dre votte, che scangiando o ven
Che poco fondo o bon Pilotto troeva
Ra Nave zira con destrezza, e ten
Ro Timon ato, finche miegio o proeva
Si attastando a poco a poco o ven
Con chiù curti scandaggi, e cose noeve
Tanto che in fin con arte, e con inzegno
Troeva un fondo bastante à ro so segno.
12
In fin per quanto tocca à fà quest'arte
Se tornasse de d'ato Tollomeo
E pensasse cangiame in man re carte
Piggiase o porrè in man ro Zebedeo
N'ho scorso (com'ho dito) ra mè parte
Ho passou spesso dre borrasche à reo
E quest'è quello ch'oeggio dive apointo,
Per fà passaggio a ro secondo pointo.
13
Hò scorso dri perighi à ri mè dì,
M'ho piggioù quarche mara becchizanna
Con ro Lebeccio drito, e miezo dì
Chiù de seme n'ho passou chiaza Romanna
Un'atra votta à ra Perosa assì
Vossi perde ra Stella Tramontanna
E se no stava con l'aggiaxo in stecca
Restava impatanoù li sciù unna Zecca
14
Un giorno con miè frè d'intre l'arbò
M'ossi ingorfà in canà con tempo grosso
Ma reniego ro corpo d'un treitò
A roziggià piggiammo un cattiv'osso
Buttammo zù ro bello, e ro megiò
E ro Mà sempre intrava à chiù no posso
Tanto che pù de poira, e de sguazzumme
Investimmo unna ciaza intro sbattumme
15
Ben m'arregordo ancon, ch'unn'atra votta
Ch'investì ra Capraia bezoegnà
Se n'era lesto intro mollà ra scotta
Se n'andavamo[sic] tutti davei de là
Che ro vasciello intro piggià ra votta
Squexi che d'ato à basso s'imbozzà
Poè d'havei tegnuo duo un miggio, ò doì
Infin no trovei miegio ch'investì.
16
Ma per tira zu ra mè concruxion
E vegnì a ro construto dro discorso
Voeggio dì, che se ben prattico son
E tanti Gorfi, e tante care ho scorso
N'ho moè havuo tanta poira intro gippon
Come in ro caxo ,ch'è l'atr'hieri occorso
Quando intro Porto vossimo negà
Con ro signò Zane Maria Canà
17
Mi haveiva tremoù com'unna foeggia,
S'o non imparava de fà coè da sè,[sic]
Però con poca voxe, e con gran doeggia
Ro sentivi chiamà San Bertomè
Ghe fuzì ben de navegà ra voeggia
E o fè sissanta voti a parei mè
A san Pero, à san Teramo, à san Lucca
Per poira de no azonze sà in zucca.
18
Careme in Terra, che no ghe voeggio stà
Butte zù quella veira mainè
Cazzè ra scotta, na lasciera andà
Madonna cara, cose sarà moè
San Bertomè no me lasciè negà
Perdoneme Segnò re mè pecchè
Quello forfante chi me gh'ha chiamoù
Che ghe viegne ro cancaro intro scioù
19
Quell'atro assì criava Confession
Confession, confession, che quest'è l'hora
Sarveme Dè ra forma dro gippon
Ch'oura hemmo l'egua se poe dì a ra gora
Ho meschinasso mi sonè c[ogi]on
Che me son osciuo imbarcá in mè mall'hora
Osciù quell'atro ghe vegniva in coe
Ra moggiè, ra Buttiega, e ri Figgioe
20
Chi dixeiva chianzando semo persi,
Se da ro Sè l'aggiutto no n'arriva
Chi desperou da matto fava versi
Chi fava Testamento, chi moriva
Dixeiva un'atro, eccane chi reversi
Chi vorrè mollà l'orza, e chi tegnira
Chi dixeiva, tirè ben quello cavo
Sboettava un'atro, orrei mollà Diao
21
Gh'era un tà minchionetto de pei tondo
Che ghe pareiva à liè d'andà de galla
Confiandose foscia, ch'in sto Mondo
Pe ro chiu questa regola non falla
Che ri C[ogioin] no troevan moè ro fondo
Che re Cocozze si stan sempre à galla
Ma se ben o pà minchion no dubitè
Ch'o sè sì Togno, come voì pensè.
22
Ma chi miè Patronetto, chi me mira
E per chiù zuinta ancora o se ne rie
Questo tà minchionetto ha un po de poira
Ch'o s'imagine foscia, che sè mie
Nà nà, mi stava li com'unna Soira
E l'è vei, ch'o no fava frenesie
Che confiou in l'aggiutto dro Segnò
N'haveivo tanta poira, come lò.
21
E tanto chiu che attorno a ro Timon
Gh'era un bon marinà, ch'è Patron Lucco
Homo eccellente in questa profession
Se ben quarcun ro ten per mamalucco
S'o n'era liè, mi son d'opinion
Che de noì no se veiva chiu pellucco
Se ben [per] poira, dixan ri minchioin
Ch'o se spandè ra Triacca intri cazoin.
22
Ro perigo foì questo in concruxion
Mirè se bezoegnava havei timò
Erimo in Porto sciù un vascello bon
Che serto à Mortuoù no n'è un megiò
L'era bonazza come lete ancon
Ro vento à tutta brilla l'era in favò
E considerè voì pe ra derriera
Se con raxon scapollo un po ra fiera.