Piaggio M. - Poesie 1846/Prefazioîn e Reviste da Çittæ/1820

by Martin Piaggio

←Prefazion, Anno 1819

Prefazioîn e Reviste da Çittæ de Martin Piaggio Prefazion, Anno 1820

Prefazion, Anno 1821→

(ediçion Pagan - 1846)

1820
*

L'anno vegio (grazie a Dio)
Dixinêuve o l’è finïo;
O l’è stæto assæ abbondante,
Ma ûn pö scarso de contante;
Uga e gran in quantitæ,
Ma i negozii troppo affiæ;
Spedizioîn, e arrivi in grande,
Ma rottûe da tûtte e bande,
Che in te l’êujo, a sæa, e o gran
S'han toccôu di belli o pan,
E in ti cangi a bon mercôu
Qualchedûn se gh’è strinnôu.

Gh’emmo avûo quelle demoette
Da frûstâ braghe e fädette
Che n’han fæto tanto andâ
Da no poeìse ciû fermâ,
E n’han misso a mâ partïo,
Ricco e poveo gh’è corrïo;
A Cometa co-a spassuïa
Che a no voeiva andâ ciù via....

Ma do resto semmo stæti
Ben contenti e soddisfæti,
Perchè Pan Grosso e Vin Bon
N’han mai fæto indigestion.

Imprinçipia l’Anno nêuvo,
Che da quello che mi trêuvo
Scrito in t’ûnn-a carta gottica
Osservâ ne-a Camera ottica,
O dev’ëse bon assæ,
E abbondante de Dinæ.

Ha da nasce tanto gran
Con tant’êujo e tanto vin,
Che (salvando o freiddo^(sic) e o coin)
Dove mettii no saviän:
Abbondanza de legûmmi,
De polenta, frûta e agrûmmi,
Funzi abbrettio, fen, castagne
Finn-a di erboi de lasagne.
(Ma se a caxo o freiddo e o coin
Fessan perde o gran e o vin?
Figgi cäi, no ghe pensemmo
Stemmo allegri perchè gh’emmo
Di Ommi bravi, che saviän
Convertî a lentiggia in gran,
E c’ûn pö de soffranin,
Sangue e colla, fâ do vin.)

O Commercio o vegniä vivo
E o cessiä d’ëse pascivo;
I mercanti intraprendiän,
Nè con perde ciù vendiän;
I sensæ devan vegnî
Comme lascie da-o corrî;

Vendiän tanto i bûtteghæ
Che restiän desbarassæ;
I artisti travaggiän,
E i camalli camalliän;
Solo i meghi han da restâ
Sempre all’ozio senza mâ;
Se godiä ûnn-a Sanitæ
Che serriän finn-a i ûspiæ;
I dottoî porriän andâ
In campagna a villezzâ,
Perchè in paxe e amô viviemo,
E nisciun ciù litighiemo;
Tûtte e figgie se majän,
Finn-a i vegi se bolliän....

Scialla! dunque che se fasse
Di Ravieû, Torta, e Cazasse
Per stâ megio in allegria
Tûtto l’anno, e così scia.