Piaggio M. - Poesie 1846/Prefazioîn e Reviste da Çittæ/1819

Prefazioîn e Reviste da Çittæ de Martin Piaggio
Prefazion, Anno 1819

1819
*

O Dixêutto, Dio lödôu,
L’emmo ascì zà terminôu!
Anno bello, e d’abbondansa,
Bon pe-a stacca, e bon pe-a pansa,
Pe-i Negozj che s’è fæto
E o Raccolto, che gh’è stæto
D’ogni grazia e ben de Dio.

O n’è stæto guæi gradïo
Da chi voeiva fâ o testardo
Pe-o baixin de San Medardo,
E fâ vende in miniatûa
Çerto pan fæto de pûa,
E chi voeiva.......ma lascemmo
Çerte corde de sûnnâ,
Dunque e bële s’allighemmo.

L’è ciù megio de pensâ
A-o nêuv’anno començôu
Che da quello che ho osservôu
In to mæ gran Telescopio-
Micos-Can-Kaleidoscopio
O dev’ese fertiliscimo
E de tûtto abbondantiscimo,

[p. 259 modifica]

Perchè abbrettio deve nasce
Uga e gran per tûtte e fasce,
Fave, fen, granon, faxêu,
Eujo a sguasso pe-i frisciêu.

O Villan paghiä a pixon,
Senza fâsea domandâ,
A-o so solito, a-o Patron...
(Chi gh'è a lente ûn pö appannâ.)

Chi negozia sä contento
De guägnâ o dexe per çento ,
Perchè tanto o s’inricchisce ...
(Ma chi a lente a l’ ingrandisce.)

A bon prexo aviemo o gran
Da-i Mercanti granattin,
Coscì faemo grosso o pan...
(Ma chi a lente a fa piccin.)

S’accattiä da-i Vinaçê
Do vin sccetto, caxo ræo,
E coscì da-i Fondeghê...
(Ma chi a lente a me fa cæo.)

Dä o so giûsto i Bûtteghæ,
Che revendan a menûo,
Coscì i Osti, co-i Moinæ...
(Ma chi a lente a me fa scûo.)

Non ghe sä frode, o malizia,
Se troviä sempre giûstizia,
Tanto fêua, che in Tribûnale,
E chi særo o Cannocciale.

Scialla dunque, allegri stemmo,
Che a ûn bon Anno incontro andemmo,
Ringraziemmone o Segnô,
Stemmo tûtti in paxe e amô,

[p. 260 modifica]

E preghemmolo de dâne
Lunga vitta, e sanitæ;
Boîn negozj per guägnâne,
Mette in costa di dinæ.

O ciù ben, che se pêu dâ
O l’è quello, mi me pâ,
De n’aveì mai de nemixi;
Di boîn libbri, e megio amixi,
Ciù bon senso, che sapienza;
Unn-a sccetta, e vëa credenza,
Casa comoda, e adattâ,
Poca réndia, ma assegûâ,
Moggê savia, e d’ûn bon coêu,
Bravi e docili Figgiêu;
Aveì pochi servitoî,
E n’aveì nisciûn patron,
Aveì tanta occûpazion
Da no siâ li oziosi a moî,
Odiâ e liti comme o Diavo,
Di dinæ non ëse scciavo,
Conservâ a so sanitæ
Cö travaggio e a sobrietæ,
Ammâ l’ommo chi è virtuoso,
Schivâ quello chi è vizioso,
Lasciâ andâ senza desgûsto
Quello ben che ha da passâ,
Aspëtâ o premio do giûsto,
Che per sempre o deve dûâ,
Che dexideo ben de coêu
A chi leze, e a chi no pêu.