Piaggio M. - Poesie 1846/Prefazioîn e Reviste da Çittæ/1818

Prefazioîn e Reviste da Çittæ de Martin Piaggio
Prefazion, Anno 1818

1818
*

L'anno vegio, grazie a Dio,
Ben o mâ l’emmo finïo;
E scibben, che questa Stæ
Ciù ûn pittin moimmo dä sæ,
Ch’e Petecce voeivan fâne
A bûrletta d’ammassâne,
E a-o so solito o Villan
O cianzeiva zà a-o Patron
Che no gh’ëa faxêu, nè gran,
Nè baccilli, nè granon,
Ch’o l’aveiva puïa do coin
Chi brûxasse a frûta e o vin,
Ch’e castagne ghe crovavan,
E che i oive ghe seccavan,
Ch’e patat. . . ma, Dio lodôu,
Ninte poi s’è ciù avverôu,
Che de tûtto gh’emmo avûo
Pe ûn pö d’ægua ch’è ciûvûo.

L’insaziabile Villan
Raccûggeito o l’ha do gran,

[p. 256 modifica]

Poche fave , assæ granon,
Da gran frûta e do vin bon,
De castagne tanta annâ
Da mangiâ, vende e seccâ,
E de funzi ûnn’abbondansa
Ch’o n’ha fæto stacca e pansa,
E e Petecce son scentæ
E da-e case, e da-i ûspiæ:

Ah ! coscì piaxesse a Dio,
Che o nêuvo Anno començôu,
Comme o vegio chi è finïo
O vegnisse terminôu!
Cose diggo?... O sä ancon megio,
Ciù abbondante assæ che o vegio,
Chè mi g’ho ûn cannoccialetto
Ch’o l’ammïa in te l’avvegnî,
E ghe lezo sccetto e netto,
(Se no sbaglio) stæ a senti:
Che ha da nasce tanto gran
(Perdonnæmea Granattin)
Che s’aviä træ lïe de pan
Per duî södi; e tanto vin
(Perdonnæmea Darsenotti)
Pe ûn quattrin ne dän duî gotti,
E tant’êujo ha da sciortî
Che frizziemo a ciù no dî;
O Commercio o sä ciù grande,
Mercanzie da tûtte e bande,
I Commissi di mercanti
Vegniän tûtti negozianti,
De gren vendie pe-i sensæ,
Da gran folla i bûtteghæ,

[p. 257 modifica]

I Camalli e i Servitoî
Han da stâ megio che i Scioî;
Quello poi che ciù me piaxe
(Cäi Dottoî soffrîlo in paxe)
No ghe sä nisciûnn-a lite,
Perchè e cose andiän ciù drite;
Se godiä gran Sanitæ,
(Meghi cäi no m’ammassæ);
Non ghe deve ciù restâ
Unn-a Figgia da majâ,
Se godiemo in ti majezzi,
Se scialliemo in ti battezzi,
E passiemo in allegria
Tûtto l’anno, e coscì sia.