Piaggio M. - Poesie 1846/Esopo Zeneize/O Villan e i so Figgiêu
| ←A Rêuza e o Spinon | Esopo Zeneize de O Villan e i so Figgiêu |
O Scoläo e a Formigoa→ |
Travaggiæ , dæve d'attorno,
Figgiêu cai, no ve stanchæ,
Un Villan dixeiva ûn giorno
A-i so Figgi ammagonæ
Perchè o l’ëa vixin a moî;
Figgi cai, stæme a sentî,
In ta Villa, o in te quell’orto
Che ve lascio, gh’è ûn tezöu
Drento ascoso in gioje e in öu,
No o vendei quando sö morto;
Per tanti anni l’ho çercôu,
Mi no so o lêugo preciso
Dove l’aggian sotterrôu,
Ma ve serve questo avviso,
Co-a pazienza se o çerchieì
Forse ûn giorno l’attrovieì:
Da per tûtto semmenæ,
Desfondæ, cavæ, sappæ,
No lasciæ ûn parmo de tæra
Senza aveìghe fæto guæra.
Morto o Poæ, tutti i Figgiêu
Non aveivan atro a coêu,
Che trovâ quello tezöu
Per spartîse e gioje e l’öu:
Giorno, e nêutte travaggiavan
Da per tûtto semmenavan,
Desfondòn, cavòn, sappòn,
E ûnn’annâ doggia piggiòn;
No trovòn mai ninte ascoso:
Ma so Poæ fù ben virtuoso
D’insegnâghe avanti moî
A manëa de fâ de l’öu;
Chè o travaggio o l'è ûn tezöu,
Questo solo o pêu inricchî.
