Piaggio M. - Poesie 1846/Esopo Zeneize/O Scoläo e a Formigoa

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Scoläo e a Formigoa
[p. 16 modifica]

FOA III.

O SCOLAO E A FORMIGOA.



Un scoläo, pezzo d’aze, mascarson,
Buggibreiga e pötron,
Solo pe-o zêugo, e pe-a demöa portôu,
Coscì nemigo zuôu
Do travaggio, do stûdio, e do latin ;
Virgilio, Ovidio, Orazio, con Çiçeon
Allighivan i denti a sto mincion,
Ghe piaxeiva ciù a balla cö ciûmmin;
Fessa d’iniquitæ!
Senz’amô, nè caitæ,
Se in stradda o l’intoppava
Un gatto, ûn can, ûnn-a galinn-a, ûn bæ,
O i piggiava a sascæ,
O i scorriva, o ghe dava , o i ammassava.

Un giorno de mattin,
Ch’o l’ëa c’ûn bacco lungo in t’ûn giardin
A fâ caccia de grigoe,
(E a quelle, ch’o piggiava, per demöa

[p. 17 modifica]

O ghe taggiava a testa, o dunque a cöa! )
O vedde in tæra un mûggio de Formigoe
Tûtte affannæ con stento a rebellâ
Da röba per provvista, e per mangiâ;
O restò stûppefæto da pazienza,
De l'inzegno e prûdenza
De tûtto quello popolo indûstrioso:
Testimonio invidioso
De tanti belli sforzi, e abilitæ,
O nostro perdigiorni cos’o fa?
(Oh eccesso de barbarie, e crûdeltæ!)
Con quello bacco o va,
Infiandolo in ta tann-a,
E frûga, e pesta tanto, ch’o e destann-a.

Scappavan povee bestie sparpaggiæ,
E tûtte desgûstæ
D’aveì perso e provviste e i magazzin,
Lê incangio o se ne rieiva o biricchin,
Anzi o gh’andava apprêuvo a scorrattâle,
A sciaccâle co-i pê, a martirizzâle,
Pe-e primme o se sciallava d’ammassâ
Quelle, che s’affannavan de salvâ
Ancon qualche provvista, ûn pö de gran,
Unn’aa de mosca, ûn fregoggin de pan.

Unn-a fra queste , ûn pö meno spuïosa,
A se fermò, e a ghe disse coraggiosa:
Bestiassa raxonâ, dimme ûn pittin
Per cose ti n’ammassi, e ti desfæ
E nostre case, e i nostri magazzin?
Dimme cose te femmo?
Che breiga mai te demmo?
Cose ti guägni, e che gûsto ti g’hæ
De fâne a tûtte o boia, e l'assascin?

[p. 18 modifica]

No guägno ninte, o ghe rispose allöa,
Ma o fasso per demöa,
Me ghe cincio, o l’è o mæ divertimento,
E meschinn-a! o te a sciacca lì a-o momento.

Poæ de famiggia, ammiæ d’invigilâ
Che i vostri figgi, quando son piccin,
No se divertan de scorrî e ammassâ
E bestie per demöa , manco i moscin,
Dunque cresciän c’ûn coêu da maxellâ,
E a tûtte e cose vorriän vedde a fin:
Quanti exempj vedemmo tûtti i giorni
De questi brûxaboschi e perdigiorni!


Piaggio.46-6.gif