Piaggio M. - Poesie 1846/Esopo Zeneize/O Cavallo e o Porco FOA IV
| ←O Scoläo e a Formigoa | Esopo Zeneize de O Cavallo e o Porco |
O Ratto in ta Formaggia e o Gatto→ |
O CAVALLO E O PORCO.
Gh’ëa ûn Porchetto — in t’ûn villaggio,
Chi no sciortiva — mai d’in to staggio;
O no pensava — che a ben mangiâ,
Beive e dormî, — grûgnî e rûmmâ.
In poco tempo — o vegnì grasso,
Che a stento o poeiva— fâ qualche passo;
Ma con levâse — tûtte e so coæ,
O s’annojava — ne-a moscitæ.
In quello stato — tristo e indolente
O l’invidiava — e dava mente
A ûn poveo bestia — de Cavallin,
Chi rebellava — seia e mattin
Unn-a carrozza — con stento e sûô,
A freido, a cado , — a ægua, a sô,
Ma pù o vegniva — sempre ciù bello,
Grasso, lûxente, — visposo e snello.
Mentre o façeiva — ste riflescioîn,
Passa a proposito — o Cavallin:
Ferma, o ghe sbraggia, — bestia da tïo,
Dimme per cose? — (dando ûn sospïo)
Ninte me piaxe, — tûtto me tedia,
Senza appetitto — creppo d’inedia?
Mi, che a mæ vitta — ëa de mangiâ,
Beive, dormî, — grûgnî e rûmmâ!
E ti, che in cangio — sempre te tocca
De tiâ e stentâ — cö morscio in bocca,
E che ti mangi — ûn pö de fen,
Ti ê sempre allegro, — e ti stæ ben?
Rispose pronto — o Cavallin:
Ti hæ da saveì, — re di pötroin,
Che vitta comoda, — ozio e leccaja
Partoiscian sempre — tedio e bagiaja;
Che da-o travaggio — co-a sobrietæ
Nasce o contento — e a sanitæ.
