Piaggio M. - Poesie 1846/Esopo Zeneize/O Figgiêu e a Vespa
| ←O Matrimonio dell'Agno | Esopo Zeneize de O Figgiêu e a Vespa |
O Lô e o Bæ→ |
FOA XI.
Un bardascia de Figgiêu,
Che stâ drito appenn-a o pêu,
O l'ëa ûn giorno in t’ûn giardin,
Pin de scene e d’axillin,
Camminando, galoppando,
Giando sempre, sätezzando,
O l’arranca aoa ûnn-a scioetta,
Aoa o streppa dell’erbetta,
Aoa o zêuga a-i sasci o ä balla,
Aoa o scöre ûnn-a farfalla,
O che tresto de Figgiêu!
In ta pelle stâ o no pêu,
O desfà mezo o giardin
Con fâ sempre o burattin;
Stanco e frûsto o s’assettò,
Tûtt’assemme ghe passò
Ben d’appresso, e sghêuando bassa
Unn-a pesta de Vespassa
C’un pâ d’äe, che paeivan d’öu,
A se va a pösâ sc’ûn cöu,
Sorve ûnn’erba, in t’ûnn-a sciô,
A lûxiva comme ûn Sô;
Da lì a un pö da lê a ritorna.
O Figgiêu, chi a vedde torna
Coscì bella, e tûtta indoâ,
O a vorrieiva ûn pö piggiâ;
O l'aspëta ch’a repasse....
A l’è chi... o l’allarga e brasse...
Ghe tia presto ûnn-a magnâ,
Ma... per sorte a gh’è scappâ
Camminando comme o scento;
Lê tantæ non è contento,
Ghe ne ven sempre ciù vêuggia;
Quella a va d’in rammo in fêuggia
Giando sempre pe-o giardin,
Lê fa ûn miggio de cammin
Sempre apprêuvo a scorrattâla,
Ma o no posse mai piggiâla;
Finalmente a se stancò,
Sc’ûnn-a rêuza a se fermò.
O se scialla o Gardettin,
O va presto là ciannin
In sciä punta ben di pê,
Quando o fù vixin a lê,
Quaccio quaccio comme o gatto
Quand’o piggia qualche ratto,
O ghe tiò presto ûnn'arpâ:
Grin ti gh’è! o se misse a criâ,
O piggiò co-a Vespa a sciô:
Ma meschin de lê! Che dô
O sentì, poveo Figgiêu!
O gh’arriva finn-a a-o coêu:
A Vespassa inveninâ,
A ghe tiò ûnn-a sagoggiâ
Cö so morscio velenoso
Ch’a tegniva drento ascoso,
Ch’o cazzè, bûttando un crio,
Longo in tæra stramortïo.
Oh voî atri Zovenotti,
Che corrî comme i merlotti
Sempre apprêuvo a di piaxeì,
Che ancon ben no conosceì,
Imparæ da quest’istoja,
E tegnîve un pö a memoja
Che ben spesso e cose indoæ
Son de drento avvelenæ.
