Piaggio M. - Poesie 1846/Esopo Zeneize/O Cûcco e a Rondaninn-a
| ←L'Armon e o Spinon | Esopo Zeneize de O Cûcco e a Rondaninn-a |
O Lion vëgio→ |
FOA LXXXVIII.
Un Oxello ridicolo e insolente
Un giorno o l’incontrò ûnn-a Rondaninn-a:
Son servo riverente
(Abbassandose a côa
O disse) a questa bella scignorinn-a,
Che so che per demöa
A va sempre viaggiando,
E tûtto o mondo giando
Pe acquistâ nêuvi lûmmi,
E conosce di popoli i costûmmi,
Brava davveì! me ne rallegro assæ!
Ma, amiga caa, bezêugna che saccæ,
Scibben che poco gïo,
Perchè no m’allontann-o da-o mæ nïo,
Che in tûtti i paixi a-o mondo g’ho spaventi
D’amixi e de parenti,
Anzi ûn favô me fæ
Se qualche bonn-a nêuva me ne dæ;
Celeste pellegrinn-a,
Dîme ûn pittin de grazia, o Roscignêu
Dov’ælo? o canta sempre? comm’o sta?
Ghe rispose graziosa a Rondaninn-a:
In Italia , o sta ben, o canta a-o coêu
E tûtto o mondo va
Per sentîlo e applaudîlo — N’ho piaxeì;
Evviva o Roscignêu chi è mæ cuxin!....
O Canajo dov’ælo, che o savieì,
Lontanetto, o vixin?
L’eì mai visto?.... L’ho visto e l’ho sentïo
Da per tûtto cantâ, che bon figgiêu!
Oh comme o l’è applaudïo!
A tanti o piaxe ciù che o Roscignêu.
Bravo!.... me ne rallegro, o l’ è mæ fræ,
Che bella contentessa che me dæ!
E mæ nevo o Pavon comm’o se a passa?
In bellessa e in ricchessa
Ogni Oxello o sorpassa!
Scialla, me ne consolo, oh che allegressa!
E o mæ amigo o Frenguello cos’o fa!
Co-e Passoe sempre o sta
Chi dixe pe amicizia, e chi pe amô.
Bravo! o vêu fâ da gallo!
E mæ barba d’acquisto o Pappagallo,
Dov’o l’è, cos’o fa? o l’è sempre mûtto?
Per ninte! anzi l'ho inteizo da per tûtto
Parlâ comme ûn Dottô,
Tegnî conversazion
Sempre sotto o barcon . . .
Braviscimo! ben fæto! o l’indovinn-a,
Coscì o sä conosciûo da tûtti ben!...
E mæ cûgnôu?... ma stûffa a Rondaninn-a,
A cûxitæ ghe ven
De conosce ûn pittin quello che tanto
Voeiva saveì, e s’ûsûrpava o vanto
D’appartegnî a-e famiggie ciù distinte
Do gran regno dell’aja: E voî chi seì?
(Ghe domandò modesta).
Quello pin de superbia ghe rispose:
E no me conosceì?
Mi, figgio cao, per ninte!
Eì perso dunque a testa?
Son conosciûo da tûtti, e son famose
E mæ impreize pe-o mondo, conosceime,
Me ciammo o Cûcco, e quell’onô rendeime
Che me merito!.. O Cûcco voî! Scì, o son,
Comme? stordïa! ne dubitiësci ancon? ...
A questa presuntuosa so risposta
Sûbito a se descosta;
A o squaddra primma ben da cappapê,
Poi riendose de lê:
Ti n’hæ miga (a ghe dixe) fæto errô?
Te creddo in cangio ûn gran bell’impostô!
