Piaggio M. - Poesie 1846/Esopo Zeneize/O Lion vëgio
| ←O Cûcco e a Rondaninn-a | Esopo Zeneize de O Lion vëgio |
O Cannocciale da Speranza→ |
FOA LXXXIX.
Un Lïon, chi aveiva fæto
Do gran mâ in so zoventù,
Addentôu, stroppiôu, desfæto
Mille bestie, e forse ciù,
Appagando a so voentæ
Con fâ stragi, e crûdeltæ:
Vegnûo vegio o diventò
Senza forza nè coraggio,
Senza amixi o se trovò
Accoegôu solo in t’ûn staggio;
Tûtte e bestie che passavan,
Finn-a l’Aze, l’addentavan.
Han raxon, e me sta ben!
(Tardi o disse) mi che poeivo
Fâme amâ con fâ do ben,
Fâme quanti amixi voeivo,
Me son fæto incangio odiâ,
E m'è reizo mâ per mâ!
Chi fa o bûllo e o prepotente,
Tosto o tardi se ne pente.
