Piaggio M. - Poesie 1846/Esopo Zeneize/O Cannocciale da Speranza
| ←O Lion vëgio | Esopo Zeneize de O Cannocciale da Speranza |
I Ratti e o Figgiêu→ |
FOA XC.
Unn-a votta a Speranza
A fè dell’àncoa ûn bello cannocciale
Per dâlo a ogni mortale
Perchè o se ghe demoasse,
E a so piaxeì qualunque cosa o miasse.
Questo strûmento è fæto comme i atri,
E da viaggio, e da Teatri,
Che visto da unn-a parte o l’ingrandisce
L’oggetto fêua mezûa,
Dall’atra ö diminuisce
Ch’o pâ ûnn-a miniatûa.
L’ommo o l’ha sempre in man
E veggiando e dormindo ,
Stando fermo e corrindo.
Quand’o se o mette all’êuggio, e ch’o gh’ammïa
Dä lente grossa, o l’è in malinconia
Perchè o vedde a Speranza dä lontan;
Ma se o gh’ammïa dä lente ciù piccinn-a,
Se ghe rallegra o coêu
Perchè o vedde a Speranza assæ vixinn-a;
O sperâ ciù ch’o pêu,
Ma a forza de sperâ,
De vedde e d’aspëtâ,
In to ciù bello o ghe scappa dall’êuggio,
E o resta comme Olimpia lì in sc’ûn schêuggio.
