Piaggio M. - Poesie 1846/Esopo Zeneize/I Ratti e o Figgiêu
| ←O Cannocciale da Speranza | Esopo Zeneize de I Ratti e o Figgiêu |
O Cavallo e l'Aze→ |
FOA XCI.
Intrò ûn giorno sbalordïo
Un Rattin quæxi da nïo
In ta stanza d’ûn Figgiêu
Giûdizioso, e de bon coêu.
Ah! ti è chì n’æh mascarson!
Ti è vegnûo (o se misse a criâ)
A mangiâme a colazion,
E a mæ roba a roziggiâ?...
Te ne fö pentî, sciô Ratto,
Aoa aspëta... ciammo o Gatto.
Ma o Rattin ninte sentiva,
In sà e in là presto o corriva,
Annastando per çercâ
Qualche cosa da mangiâ;
Finalmente o l’attrovò
Un pittin de pan, o criò
Comme in segno d’allegria;
O Figgiêu ch’ö stava a mia
Per cûxitæ, ö lasciò fâ,
Ma o n’ö mangiò, ö portò via;
Quando ä tann-a o fù vixin,
O cacciò de nêuvo ûn crïo:
Sciortì fêua da lì a ûn pittin
Un Rattin ciù regaggïo
Che pe-i oeggie o rebellava
Un ratton vegio chi ansciava,
Orbo affæto, o l’ëa so Poæ!
I dui figgi invexendæ
Fêua da tann-a o fèn fermâ,
Presto o pan ghe menissòn,
Sotto o mento ghe o pösòn,
E n’andòn torna a çercâ,
Lê o n’aveiva che a chinnâse
Per piggiâselo, e çibbâse,
Che i duî fræ ghe l’ammûggiavan,
Sempre attenti e con premmûa,
Se o no poeiva, l’imboccavan.
Oh natûa, bella natûa!
(Mäveggiôu quello figgiêu
O se misse forte a dî)
Comme ti te fæ sentî!
E ti parli a tûtti a-o coêu!...
Provvidenza do Creatô!
In te bestie tanto amô?
A so voxe a i spaventò,
E meschin tûtti affannæ
Retiòn presto in casa o Poæ;
Un per guardia se fermò
In sciä porta, l’atro intanto
O sarvava o Poæ in t’ûn canto.
No temmeì, sciortî, figgiêu,
(Disse intenerïo o figgiêu)
Che m’eì dæto ûnn-a lezion
Chi m’ha proprio edificôu,
Ve ne son tanto obbligôu;
Questa vostra bella azion
In asciste ûn poveo Poæ
Per instruî l’ûmanitæ
Ve dà anchêu vitta e existenza;
Vegnî pù con confidenza
Da chì avanti quando voei
Ne-a mæ càmea, che trovieì
Da mangiâ e per lê e per voî:
Ratti cäi, n’eì ciù da moî
Nè dä famme, nè dä puïa,
Perchè daggo o Gatto via,
No gh’avieì ciù de nemixi,
Stæmo in paxe, e sempre amixi,
E sä vostra casa mæ.
Quelli Ratti riparpæ,
Paeiva proprio che sentissan
Quanto disse, e che o capissan,
Perchè in seguito gh’andòn
Tûtti i giorni, e ghe trovòn
Pan, formaggio che mangiavan,
E a-o Poæ sempre ne portavan,
Che ancon di anni o l’è campôu;
E lô poi per ricompensa
No g’han mai ciù roziggiôu
Nè a mobilia, nè in despensa,
E gh’andavan nêutte, e giorno
Comme a ûn nêuvo Poæ d’attorno;
E o Figgiêu pe-o so bon coêu
O l’andò d’in ben in megio,
Vegnûo ricco, o creppò vegio
In te brasse a-i so figgiêu
Stæti sempre decantæ,
Figgi degni de so Poæ.
