Ms. Marston 56/De li trenta grai de messê san Ieronimo/13

Da Wikivivàgna
Manoscrito Marston 56, 1465
De li trenta grai de messê san Jerömmo
Lo tersso decimo grao si è timô
azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu);
lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze;
[p. 168r modifica]

Lo tersso decimo grao è timô

Lo tersso decimo grao si è timô. De lo quâ Xe. disse in lo Evangerio: "Non vogai teme quelli chi amassam lo corpo e pöa e' non pon fâ atro, ma temei quello chi pö amassâ lo corpo e pöa o mete la anima in lo infferno."

E san Zoane evangelista dixe che non demo avei atro timô cha quello de Dee.

De che Zacharia proffeta disse che la caritae cassa ogni timô.

E santo Agustin dixe che demo teme Dee e non como inimigo, asochê lo fuziamo, ma e' demo dexirâ de fâ cossa chi ge piaxe.

E Davit proffeta dixe: "Quelli temem Dee, quelli chi fam li söi comandamenti, e lo timô de Dee ge sta senper fermo." E anchora o dixe: "Figiöi odime e mi chi ameistro in lo timô de Dee, chi vö veramenti vei lo bem restrenza la lengoa da lo mâ e le larve che non digem mâ e fa lo bem e cerchâ la paxe e falla."

E Saramon dixe che lo timô de Dee è la vera sapiencia. E cossì coma[sic] la rastoira cassa le mosche e lo vento cassa la negia, cossì lo timô de Dee cassa lo peccao.

E santo Agustim dixe che sum monti chi dixem che temem Dee, ma no como e' dem, perssochè deveream vorei fuzî quello mâ chi dura senper, ma la pu parte temem pu la gente tenporâ cha le eternai, e si temem pu li ministri de lo mondo cha Dee.

E san Jirönimo dixe: "Unde e' me sea, e como me sea, e fassa so che vögia, o me pâ che degia odî quella voxe teriber chi dirà: «Levaive morti e vegnine a lu[sic] zuixo». E sum questo e' pensso senper con lo cör e con la mente [p. 168v modifica]e si tremo tuto penssando che questo zuxe è si savio che o sa nomerâ tuti li cavelli de la testa, e si è forte in lo dì de la soa ira, e si è quello chi ronpirà li regni, e si è justo eciamdee che de ogni parolla odioza o ne vorà fâ raxom, e questo timô o lo dè vore[sic] avei ogni homo chi vögia esse justo.

E santo Anbröxio dixe in questa mainera che lo homo dè vorei teme Dee, soè dè fâ quello chi ge piaxe, e si dè considerâ quello chi segoe a chi fa lo contrario, e quello o dè teme, asochè o non caza in questi perigi, e che per maricia o non ronpe li comandamenti de Dee, asochè per justixa o non prevegna a quelli dani.

E san Sidero dixe che lo veraxe timô de Dee si è, che l'omo cognosse che ello abia tanto offeizo, che o non porea mai sastiffâ, se Dee per la soa mizericordia non ge perdonasse lo debito, e per questa caxom o dè senper teme, asochè o non sea privao de la gracia de Dee.

E san Baxirio dixe che lo timô de Dee è grande cossa. E lo timô de Dee si è, che lo homo cognosse che in Dee è ogni possansa e ogni preffeciom, e che o se cognossa che ello è tanto degeto che o non porea stâ senssa quella perfeciom, e che o no porea avei nissum aitörio salvo da Dee, e per questa caxom o lo covem senper teme, asochè o non reste rebello da quella bona vorentae. Anchora o dè considerâ che o non è nissum si justo chi per debito ge possa mendâ nissuna cossa.

E san Remixio dixe che non demo teme ni homo ni demonio, salvo in tanto che elli ne pon mete in l'ira de Dee, e cossì e' demo teme Dee in seculla.