Lunaio Regiña 1890/O parlamento
| ←Tûtti i mestê son vegnûi diffiçili | Lunaio zeneize compilao da-o sciô Regiña & C. pe l'anno 1890 O parlamento |
E donne brûtte→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
No gh'é Salvator Rosa né Callotta
Che ne-o grottesco possan superâ
O quaddro che veddei qualunque votta
Che gh'é quarche gran lezze da votâ.
Veddei spuntâ de faccie d'ogni cô,
E, senza voeilo, diventæ pittô.
2.
A-a drita ghe veddei de masche rionde
Che quelle di canonici in san Loenso
Rimpætto a queste pêuan andase a asconde;
E s'ei quarche fregoggia de bon senso
Ve pä che diggan: « Semmo moderæ,
« Perchè de ganasciêuia n'emmo assæ. »
3.
A-o centro ghe veddei de çerte masche
Za pinn-e in parte, e in parte ancon da impî,
Che quande s'avvixinn-a de bôrrasche,
O quande no san ciù con chi tegnî,
Tegnan con a pagnocca a tûtti i conti,
E pe mangiäla son delungo pronti.
4.
A-a sinistra veddei de çerte faccie
Che pan quella do sciö Conte Ugolin:
Secche, lunghe, patïe, pinn-e de maccie,
Con êuggi aggriffonæ, denti cagnin,
E che co-a bocca larga e spalancâ
Aspëtan l'occaxon pe roziggiâ.
5.
S'arve a sedûta. Ghe pä tante grû
Co-o collo lungo pe aggueitä chi colla.
Ven l'incidente, e sätan tûtti sciû
Driti e sinistri pe piggiä a parolla;
E fan descadenä tanto rûmô
Che no s'intenda manco ciû tra lö.
6.
Comme sbraggiä se sente e donne a-i trêuggi,
O se veddan insemme abberrûffæ
Streppase i ciûffi e granfignäse i êuggi,
E disene de tutte e qualitæ:
Coscì tra quelle gente tutte instrûïe
Se dixan roba chi vergêugna e prie.
7.
Sentï di sbraggi, veddeì fä çert'atti,
Sentï piccä pe-i banchi de magnæ,
Che ve pan gente da serrä co-i matti:
Ma creddei in sciö serio e ve pensæ
Che cûran l'interesse nazionale?
Sbraggian pe puro scopo personale!...
8.
Arcadie do Seiçento, andæve a asconde!
Pastoî, satiri e ninfe, donde sei?
Vegnî chi tutti, via no fæ ciù e gronde!
Recillæve da-o gûsto e da-o piaxei
Che tra pegôe, tra boschi e rien d'argento
A questa nêuv'Arcadia v'appresento!
9.
Vegnî, che invece de mangiä de giande
Mangieì di pollastretti a-a cavallaia!!
Vegnï, vegnï, che invece de ghirlande
E de coronn-e e scimile porcaia,
Saieì provvisti de biggetti gianchi
Che peizan poco, ma van mille franchi!
10.
Vegnî chì sotto l'èrbo da cöcagna!
Da nêutte fæne giorno; e tra o gran sciäto
Destappæ de bottiggie de Sciampagna!
Ei miga puia che ghe rimette o Stato?
O che vagghe a Finanza in perdizion?
Stæ allegri! paga tûtto Pantalon.