Lunaio Regiña 1890/E donne brûtte
| ←O parlamento | Lunaio zeneize compilao da-o sciô Regiña & C. pe l'anno 1890 E donne brûtte |
Galileo Galilei davanti a-o Tribunale da Santa Inquixizion→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Gente cäe, ve o diggo a tûtte
Che me piaxe e donne brûtte
Perchè son ciû spiritoze,
Ciû fedeli, ciû amoroze;
Perchè mostran ciû bontæ,
Pe döe frasche che ghe fæ.
2.
Manco creddive no poei
Che ne fæ quello che voei
Tanto son riconoscenti,
Bonn-e, affabili, obbedienti
Quande speran, quande san
De possede a vostra man.
3.
Donna brûtta e donna instruïa
Ve dan ciû ne-a fantaxïa,
Perché in grazia do talento
Son dotæ d'ûn sentimento
Cosci pûro e delicôu
Chi ve rende fortunnôu.
4.
Donna bælla e mädûcâ,
Donna bælla e desgaibâ,
Donna bælla e donna fatta,
Donna bælla e donna matta
Son l'eterna despeazion
Do ciû forte e do ciû bon.
5.
In te bælle e ciû bizzare
Gh'è delungo do volgare:
Gh'è da roba conosciûa,
Zà provä, zà possedûa:
Gh'è de çerte qualitæ
Che d'ammïale ve stûffæ.
6.
In te brûtte gh'è l'amô
De l'angiëto do Segnô:
Gh'è do vario, gh'è do nêuvo
Che gh'andæ delungo apprêuvo,
E decidive no sei
A lasciä questo piaxei.
7.
In te bælle, ne l'ammiäle,
Ghe trovæ o convenzionale,
O vizioso, l'apparente,
O maligno, l'insolente,
Da tortûa, de l'opprescion
Con l'aspætto da pascion.
8.
In te brûtte ghe trovæ
Ciû franchessa, ciû veitæ,
Ciû costanza e sacrifizio
A totale benefizio
De chi e piggia pe moggê;
Comme dixe o mæ pappê.