Lunaio Regiña 1890/Sûnetto 1
| ←E donne brûtte | Lunaio zeneize compilao da-o sciô Regiña & C. pe l'anno 1890 Galileo Galilei davanti a-o Tribunale da Santa Inquixizion |
Galileo in Arcetri→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
celebre pittô Zeneize
Galileo Galilei davanti a-o Tribunale
da Santa Inquixizion
Sûnetto
Se foise vivo o gran Raffæ d'Urbin
E ch'o veddesse o sommo Galileo
Dipinto da Nicolla Barabin.
In quest'affresco, o s'inchinieiva a-o veo.
Gh'è dreato do pietoso e do divin,
Tanto chêu, tanta forza de pensceo,
Che cianzei d'allegressa e de venin,
E piggiæ fêugo, e diventæ de zeo.
Se vedde Galileo che con costanza
Davanti a quelli fratti inquixitoî,
Pe-a Bibbia o no a dà vinta all'ignoranza
Quelle figûe stûpende, quelli coî
Ammiæli da vixin e in lontananza,
E ciamiei Barabin re di pittoî!