Lunaio Regiña 1890/Tûtti i mestê son vegnûi diffiçili
| ←A Töre Eiffel | Lunaio zeneize compilao da-o sciô Regiña & C. pe l'anno 1890 Tûtti i mestê son vegnûi diffiçili |
O parlamento→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
- Canson -
In to secolo di lûmmi,
De progresso e civiltæ
Tutti i popoli e i costûmmi
Con i tempi son cangiæ:
E se stenta e gh'é da fä
Tûtto o mondo a contentä.
2.
No gh'è bravo e bon ministro:
Pin de zelo pe-a nazion
Ch'o no temme d'ûn sinistro
Meditôu da-o mascarson
Chi fa mostra d'inciagâlo,
Con l'idea d'assascinâlo.
3.
No se trêuva depûtôu
Liberale e coscienzioso
Chi no segge criticôû
Da-o partïo maligno e giöso
Che pe-o trionfo da sò lista
O gh'opponn-e ûn affarista.
4.
Tanti bravi magistrati,
Se no fan parzialitæ,
Se no leccan i avvocati,
Han da vive in anscietæ
Pe trasloco e sospenscion,
O pe tarda promozion.
5.
I avvocati de cartello,
Se no fan da ciarlatan
In te questo clûbbe o in quello,
Gran clientela no se fan:
O s'avessan di gren clienti
Son passæ pe cavadenti.
6.
Tanti meghi de dottrinn-a
Pregan d'ëse savattin
Perchè l'arte da mëxinn-a
A l'é bonn-a pe-i scciappin,
Che, sûnando ciù campann-e,
Han do nomme de cazann-e.
7.
Anche i poeti, meschinetti,
Se no son de quella niâ,
Se no n'imitan Stecchetti
E i veristi da giornâ;
No sän scarsci de lettoî,
Ma no trêuvan d'editoî.
8.
Scinn-a o præve democratico,
Bon patriota e liberale;
Scinn-a o præve ciù fanatico
Do Potere Temporale;
Se no son da Prelatûa,
Fan da famme a ciû çernûa.
9.
Tanti meistri de villaggio
Co-o stipendio che ghe dan
Pêuan giasciä di spighi d'aggio,
E mangiä cotello e pan.
Comme fan tûtti i paizen
E i garsoin da massachen.
10.
Pe miggiæa de concorrenti
L'é o mestê de l'impiegôu
Fadigozo e pin de stenti,
Umiliante e mä pagôu.
E ghe vêu bælla moggê
Pe poeì fä questo mestê.
11.
Anche i sbiri da Questûa
Scrupolozi a-o sò dovei,
Pin de zelo e de bravûa,
Han ben spesso o despiaxei.
De passä pe mâdûchæ,
O pe birbi, o bullibæ.