 |
Questa pagina a no l'è stæta corretta. | |
9.
Tanti meistri de villaggio
Co-o stipendio che ghe dan
Pêuan giasciä di spighi d'aggio,
E mangiä cotello e pan.
Comme fan tûtti i paizen
E i garsoin da massachen.
10.
Pe miggiæa de concorrenti
L'é o mestê de l'impiegôu
Fadigozo e pin de stenti,
Umiliante e mä pagôu.
E ghe vêu bælla moggê
Pe poeì fä questo mestê.
11.
Anche i sbiri da Questûa
Scrupolozi a-o sò dovei,
Pin de zelo e de bravûa,
Han ben spesso o despiaxei.
De passä pe mâdûchæ,
O pe birbi, o bullibæ.
No gh'é Salvator Rosa né Callotta
Che ne-o grottesco possan superâ
O quaddro che veddei qualunque votta
Che gh'é quarche gran lezze da votâ.
Veddei spuntâ de faccie d'ogni cô,
E, senza voeilo, diventæ pittô.
2.
A-a drita ghe veddei de masche rionde
Che quelle di canonici in san Loenso
Rimpætto a queste pêuan andase a asconde;
E s'ei quarche fregoggia de bon senso
Ve pä che diggan: « Semmo moderæ,
« Perchè de ganasciêuia n'emmo assæ. »
