Lunaio Regiña 1890/A bandëta
| ←E lamente do cappello a cilindro | Lunaio zeneize compilao da-o sciô Regiña & C. pe l'anno 1890 A bandëta |
A Töre Eiffel→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Che vastissimo argomento.
M'ofre ûn tocco de pappê
Ch'o l'addescia un pö de vento
Ciû soäve che l'amê
In to forte là da stæ
Quando moïmo soffochæ!
2.
Pe no rendime tediozo
Brevemente ve diö
Che l'è strano e ben cuiozo
O ragguaglio che ve dö
In sciö conto d'un arneize
Chi è d'origine Chineize.
3.
Sci, ne-o secolo di lûmmi
Questa semplice invenzion
A portava ne-i costûmmi
Unn-a vea rivoluzion
Perchè l'ûzo da bandëta
O l'ha a côa comme a comëta.
4.
Çerte donne specialmente
Quante cose vêuan mai dï
Ne-o mesciala solamente!
Quante cose fan capï
Da-o sò moddo de tegnïla,
Ne-o cegäla e ne l'arvïla!..
5.
Quande a caccian zû a derrûo,
Sensa gaibo, in abbandon,
Pä che diggan: No me cûo
Do sò amô, da sò pascion!
Cöso cao, se scià nö sà,
G'ho di megio che voscià.
6.
Quando a tegnan li tra i denti
Concentræ tûtte tra lö
A-i ciû tristi pensamenti
Son ridûte da l'amô:
E per puia do manaman
In consûmmo se ne van.
7.
Quande a mescian ciû spedio
Mentre cöran spensieræ
Pä che diggan: me ne rio
Di gren ciæti che me fæ!
Son civetta, scignorscì,
Ma son libera de mi!
8.
Quande a caccian sciù per l'äia
L'è segnale che se pêu,
Che no fan tanto a stundaia,
Che temanza no ghe vêu
Ne-o tegnïghe compagnia
Pe amicizia e cortexia.
9.
Quande a loccian de traverso
Dan segnale d'aspetä,
Perchè dunque no gh'è verso
De no fälo sospettä
D'ûn sospio, d'ûn'esprescion
Senza scopo e riflescion.
11.
Tanto in gëxa comme in teatro
Quande gh'è solennitæ
Che ghe cöre ûn mondo e l'ätro,
Basta solo che l'ammiæ
Pe conosce e pe capî
Tûtto quello che yêuan dî.
12.
Quella là chi a loccia adäxo
Mentre a giascia da per lê
Quarche Pater dito a cäxo,
Pä ch'a digghe ammiando o çê:
Perchè in çenie andava e braxe
Me ghe daggo proprio paxe!
13.
Quella là che lentamente:
A remescia ûn bandëton
Con quell'äia indifferente
Ch'a l'ha tûtta l'esprescion
Do smorfiozo e de l'oibò,
Pa ch'a digghe: Mi ghe l'ho!
14.
Quella là che con veemenza
A remescia o bandëtin,
Ne-o candö de l'innocenza
Contemplando ûn damerin
Tûtto gaibo e civiltæ,
Pâ ch'a digghe: Mi o piggiæ!
15.
Anche in Corte e in Parlamento:
Gravi stûddii gh'é da fä
In sciö vario locciamento;
E gh'é scinn-a da sbraggiä:
« E bandëte han a virtû
« De poei tiä delungo i ciû! »