 |
Questa pagina a no l'è stæta corretta. | |
Sciscignori, e raritæ
Quando son ben remenæ
Posso divela segûa
Che fan tûtte a mæ figûa.
Che vastissimo argomento.
M'ofre ûn tocco de pappê
Ch'o l'addescia un pö de vento
Ciû soäve che l'amê
In to forte là da stæ
Quando moïmo soffochæ!
2.
Pe no rendime tediozo
Brevemente ve diö
Che l'è strano e ben cuiozo
O ragguaglio che ve dö
In sciö conto d'un arneize
Chi è d'origine Chineize.
3.
Sci, ne-o secolo di lûmmi
Questa semplice invenzion
A portava ne-i costûmmi
Unn-a vea rivoluzion
Perchè l'ûzo da bandëta
O l'ha a côa comme a comëta.
4.
Çerte donne specialmente
Quante cose vêuan mai dï
Ne-o mesciala solamente!
Quante cose fan capï
Da-o sò moddo de tegnïla,
Ne-o cegäla e ne l'arvïla!..
