 |
Questa pagina a no l'è stæta corretta. | |
5.
Quande a caccian zû a derrûo,
Sensa gaibo, in abbandon,
Pä che diggan: No me cûo
Do sò amô, da sò pascion!
Cöso cao, se scià nö sà,
G'ho di megio che voscià.
6.
Quando a tegnan li tra i denti
Concentræ tûtte tra lö
A-i ciû tristi pensamenti
Son ridûte da l'amô:
E per puia do manaman
In consûmmo se ne van.
7.
Quande a mescian ciû spedio
Mentre cöran spensieræ
Pä che diggan: me ne rio
Di gren ciæti che me fæ!
Son civetta, scignorscì,
Ma son libera de mi!
8.
Quande a caccian sciù per l'äia
L'è segnale che se pêu,
Che no fan tanto a stundaia,
Che temanza no ghe vêu
Ne-o tegnïghe compagnia
Pe amicizia e cortexia.
9.
Quande a loccian de traverso
Dan segnale d'aspetä,
Perchè dunque no gh'è verso
De no fälo sospettä
D'ûn sospio, d'ûn'esprescion
Senza scopo e riflescion.
