Lunaio Regiña 1888/Prefazion
Prefazion
Pin de gräve pensamento,
Tristo, rôuzo e mäcontento,
Brûxattôu comme ûn beschêutto
S'appresenta l'Ottantêutto
Detestando de sò fræ
A rischiöza ereditæ.
2.
O nasceìva zà marotto
Fra cholera e terramotto,
Fra dissæsti finanziäi,
Fra disastri ferroviäi,
Con davanti ûn avvegnî
Bôrrascözo a ciù no dî.
3.
E da-a lunxi o vedde a Rûscia
Con o mantexo chi sciûscia
Giorno e nêutte in ta cadëa
Da politica Européa
Pe levase quella coæ
De sparä döe cannonæ.
4.
O contempla l'Inghiltæra
Che, spuiöza d'ûnn-a guæra,
Co-e sterlinn-e sitto, sitto
A spedisce nell'Egitto
Un esercito Italian
Ciù che pronto a däghe man.
5.
O l'ammïa de sottovento
Tûtta l'Austria in armamento
Con l'idea de däghe addosso
All'Autocrate colosso
S'o spuntasse da-i Balchen
Dond'a l'é no ghe conven.
6.
O l'ammia tûtta a Germania
Chi no säta e chi no smania,
Chi no n'anscia e no parpella,
Ma ch'a sta de sentinella
Pe difende, pe aggiûttâ
A carnale sò alleâ.
7.
In brûtt'ægue o vedde a Fransa
E Bismarke in lontanansa
Che co-a sò diplomazia
O ghe semina a gioxïa,
O sospætto, a corrûzion,
Che son pëzo che o cannon.
8.
Ma no serve o Bismarkismo
A reprimme o socialismo
Chi porrieìva inträ ne-a lite
Con petrolio e dinamite
E mostraghe in pieno sô
I sò giorni de terrô.
9.
Tra politiche tortûe,
Tra vedûte coscì scûe
Pä che spunte d'in distante
Unn-a lûxe confortante
Se l'Italia, a quanto pä,
Da-a prûdenza a no sciortiä.
10.
Tra l'affanno chi tormenta,
Questa lûxe a s'argomenta
Da-o discorso da Coronn-a
Tûtto pin de röba bonn-a,
Pin de læte, pin d'amê,
Con l'applauzo di foestê.
11.
Ma l'é giûsto e conveniente
Che se pense seriamente
A sanâ l'Agricoltûa,
O Commercio chi derrûa;
A no spende ciù mioin
Pe servî çerte ambizioîn.
12.
Çerte smanie de conquista
Dan motivo a-o socialista
De sbraggiâ continuamente
Che ne-o secolo presente
Con assäti e cannonæ
No s'imponn-e a civiltæ.
13.
Ritornando a-o nostro annetto,
O no vedde ûn dïo de netto
In ta nostra bælla Zena
Da gran tempo fæta scena
De discordia e de venin
Tra o consorzio çittadin.
14.
O no vedde che borsisti,
Che intriganti, che affaristi,
Che sensæ de l'angonïa,
Clûbbe, ciassa e sacrestïa,
E mercanti e bûtteghæ
Contro Zena coalizzæ.
15.
Tûtti marsci e pin de raggia
No l'intendan ch'o ghe sbraggia:
Voeì mandâ proprio in rovinn-a
Questa Ligure reginn-a?
A stimmæ pe patrio amô
O sbranäla comme o lô?
16.
Figgi cäi, ghe vêu prûdenza,
Bonnafede, confidenza,
Ciù caitæ, meno egoismo,
Meno smania d'affarismo,
Meno famme d'ambizion;
Comme dixe a Prefazion.