Lunaio Regiña 1888/In löde do Pessotto
| ←Prefazion | Lunaio zeneize compilao da-o sciô Regiña & C. pe l'anno 1888 de In löde do Pessotto |
E Scignöe in riçevimento→ |
Canson
Sciä Mixinetta bella,
Me vegno a rallegrâ
D'aveila vista andâ
Lûxente comme Stella
Per Zena a passeggiâ,
E inchinâ da ogni poæ, da ogni zoenotto
Vestïa do sò gianchiscimo Pessotto.
2.
Canto o spazioso e bello
Sò fronte emançipôu
Da-o riççoaccannaggiôu;
– Ma no sò ûsâ o pennello
Pe esprimme, illûminôu
Da l'arbô do sò vello, o sò faccin
Ch'o pâ in diamante aççeiso, o pâ ûn rûbin.
3.
Mûza, che sempre timida,
E sempre contristâ,
Ti me cantavi e glorie
Da nostra eta passâ,
– Arvi o to chêu, consòlite,
Che in ta nostra Çittæ per bonn-a Sòrte
A Grazia e a Dignitæ no so' ancon morte!
4.
Nobile sciâ Mixinn-a,
Ghe zûo pe-a mæ Canson
Che mai né a Cappellinn-a,
Né o largo Cappellon,
Né a frangiabirricchinn-a,
Né o Diadema in to palco, o in to salotto,
Coscì bella ä pêuan fâ comme o Pessotto.
5.
Umile e rispettoso
Ghe porto o grato inchin
Di mæ Conçittadin
Che andavan d'arescoso
Dixendose ciannin:
– « Mia che bello Pessotto! Oh che gianchessa!
« Se o Pessotto o tornasse, oh che bellessa!
6.
Vello de neive finn-a,
Che e Grazie mäveggiæ
Lasciôn pe ereditæ
A-o[sic] Ligure marinn-a,
Vanto de nostre Moæ,
M'inchinn-o a-a to imponensa, e in ti salûo
A Damma ciù onorâ c'ho conosciûo!
7.
Bællo o vegnî da Stæ
Se a-o primmo sò apparî
Veddescimo sciortî
De neìve incoronæ
Tûtte e nostre Meitæ,
Tûtte e nostre Ragasse, e fâse largo
In mëzo a-i Ommi a discipâ o letargo!
8.
Finn-a a nostra Reginn-a
Ne-a Sò Augùsta Personn-a,
De noî, non zà padronn-a,
Ma voendose mostrâ Conçittadinn-a,
A se cangiò a Coronn-a
Cö Pessotto gentî quelle giornæ
Ch'a fù, o primm'anno, a salutâ a Çittæ.
9.
Pövea generazion
De donne da giornâ,
Ti é proprio disgraziâ!
– Ti no conosci ancon
Con tûtto o tò studiâ
Romansi e figûrin, questo che ciù
Te pêu ornâ de Bellessa e de Virtù!
10.
No gh'è ignorante o dòtto
Foestê che, appenn-a intrôu,
No çerche invexendôu
De contemplâ ûn Pessotto:
– Ma ognûn mortificôu
Finn'aoa g'ha risposto co'ûn sospïo,
Con ûn scciuppòn de cianze: « o l'è sparïo! »
11.
Ma doppo sto gran giorno,
Sciä Mixinetta bella,
Conto ch'o fä ritorno
Comme ûnn'antiga stella:
– E alloa per tûtto intorno,
E in grazia sò, veddiemo navegâ
Faccin belli in gran Veja in alto mâ,
12.
Zeffiri e ventixêu,
Raggi de Sô contenti,
Euggiæ da arrancâ o chêu,
Salûi, sprofondamenti,
– Quante armonie sciâ vêu
Da-o Çê, da-o Mâ, dä Tæra, in compagnia
Cantiän: – « Viva o Pessotto, e a sò Sciortia! »
13.
Canson, se ti hæ a fortûnn-a
De fâte amighe e nostre Scignorinn-e,
Te prego a dî a ciù d'ûnn-a
Che e nêuve Capellinn-e,
D'oxelli e grigoe pinn-e,
Son barracche mandæ da-i Pariggin
Pe offende a nobiltæ di sò faccin,
E fâle ancon pareì[sic] bisce oxellinn-e.
14.
Poi digghe ascì, (se ti hæ
Vêuggia de fâte criâ,)
Che l'é ûn tradî a caitæ
Da Patria o desprexâ
L'önô c'ha avûo tanti anni i nostri Poæ
De rischiâ a vitta in mâ,
E dâse co-i Corsæ,
Per mandâ a Zena e Donne ben vestïe,
Sûperbe in to Pessotto, e riverïe;
– E azzunzi (per finî)
Che o Pessotto in sostanza o l'é o Vestî
Portôu fin dä Madonna in sce l'Artâ.
– Poi, se no-a vêuan capî,
Ti màndile a spigoâ.