 |
Questa pagina a no l'è stæta corretta. | |
Prefazion
Pin de gräve pensamento,
Tristo, rôuzo e mäcontento,
Brûxattôu comme ûn beschêutto
S'appresenta l'Ottantêutto
Detestando de sò fræ
A rischiöza ereditæ.
2.
O nasceìva zà marotto
Fra cholera e terramotto,
Fra dissæsti finanziäi,
Fra disastri ferroviäi,
Con davanti ûn avvegnî
Bôrrascözo a ciù no dî.
3.
E da-a lunxi o vedde a Rûscia
Con o mantexo chi sciûscia
Giorno e nêutte in ta cadëa
Da politica Européa
Pe levase quella coæ
De sparä döe cannonæ.
