Lunaio Regiña 1887/A critica moderna

←L'ommo regolao

Lunaio zeneize compilao da-o sciô Regiña & C. pe l'anno 1887 A critica moderna

Conseggi a-o sciô Regiña→

A critica moderna.

Ghé^[sic] zà stæto ùn tempo bællo
Cosci bon, cosci verista,
Che se poeiva fä l'artista
Sensa tanta erûizion;

E sciortiva di travaggi
Imitæ dä moe natûa
Che cacciavan in ta pûa
Tûtti i sforsci d’istrûzion.

Gh'ëa da critica comm’aoa,
Ma da critica imparziale,
Seria, sccetta, razionale,
Sens’avei segondi fin.

E brilläva o veo inzëgno
De sò lûxe dappertûtto
Sensa mendicä l’aggiûtto
De l’astiozo scribaccin.

Noi che critica vantemmo?
Unn-a critica böxarda,
Unn-a critica bastarda,
Imbrattä de tûtto ûn pö;

Unn-a critica chi ammazza
Chi no n’é do sò partïo,
Tûtta pinn-a de regïo,
E de fischi e brävo e oh!

No parlemmo de mangiansa,
Che l’é ûn pesso che ghe penso.
Comme stemmo de bon senso?
Se raxonn-a co-i stivæ.

Pe poei fä da bonn-a mûxica
Ve ghe vêu l'artiglieria
Chi v’inspire ûn’armonia
Tûtto a sôn de cannonæ.

E ne-a mûxica vocale?
Un subisso de gren scäe
Con de vöxe da çigäe
E da grilli cantadoî.

In pittûa pe fä fortûnn-a
Basta fä de gren casette,
Di ritræti, de macciette,
Di spegassi che pan scioî.

Con ûn titolo o cû assurdo,
Unn-a pösa originale,
Imposcibile, teatrale,
Pe Canova sei passæ.

Con di værsci cûrti e lunghi
E vocaboli ostrogöti,
E penscei con i candiöti,
Sei ûn poeta o ciû stimmôu.

No se dà letteratûa
Ben pensâ, moderna e fresca
Comme a Classico Tedesca
Doppo i fæti de Sedan.

Ve discoran in te nûvie?
Ve sentî parlâ d’ecclisse ?
No capî l’Apocalisse?
In t'ûn ætte ve o spieghian.

Rappresentan in teatro
Un pastisso chi ve tedia?
Dî c'han dæto ûnn-a commedia
Da personn-e comme và.

Morte a-o popolo menûo
Chi no pêu pagâ a pötronn-a,
E ghe piaxe a röba bonn-a
E no quella che se dâ!

Quande parlan in sciö serio
D’ûn autô classico antîgo
Pe levase da l’intrîgo
Mille vescie ghe fan dî.

Forse che Dante o pensava
De parlâ cosci erûdio
Da no n’ëse ciû capîo?
Oh, che vaggan a dormî!

Mi creddeiva che Raffæle
Co-i sò quaddri mäveggiozi,
Pe no dî miracolozi,
O no foise che ûn pittô;

Quande i critici moderni
M’han provôu con strani exempi
Che Raffæle a quelli tempi
O l'ëa teologo e dottô!....