 |
Questa pagina a no l'è stæta corretta. | |
Pe schivâ de compagnie,
Quand’aççendan i lampioin
Scappo in casa, e, no voei rïe?
Mi pe lûmmo g'ho i barcoin;
Ma da tûtti son lodôu
Pe-o mæ vive regolôu!
Da-e me stacche ä mæ coscienza
No gh’é guæi diverscitæ,
Gh’é ben poca differenza
Pe rimorsci e pe dinæ;
Ma da tûtti son lodôu
Pe-o mæ vive regolôu!
A critica moderna.
Ghé[sic] zà stæto ùn tempo bællo
Cosci bon, cosci verista,
Che se poeiva fä l'artista
Sensa tanta erûizion;
E sciortiva di travaggi
Imitæ dä moe natûa
Che cacciavan in ta pûa
Tûtti i sforsci d’istrûzion.
Gh'ëa da critica comm’aoa,
Ma da critica imparziale,
Seria, sccetta, razionale,
Sens’avei segondi fin.
