 |
Questa pagina a no l'è stæta corretta. | |
Quande i critici moderni
M’han provôu con strani exempi
Che Raffæle a quelli tempi
O l'ëa teologo e dottô!....
Conseggi a-o sciô Reginn-a
Bocca a buscio, sciô Reginn-a,
Stanni ascozo in ta marscinn-a,
Særa l'êuggio e dormi ben
In to cuccio comme i chen.
Comme i fratti ceiga o collo,
Fa da sordo, fa da sciollo,
E li fermo e drîto in pê
Fa da pälo e da candê.
Se t’incontri quarche spïa
Comme o lampo scappa vïa,
E de l'arte do sciûsciâ
No ne dî nè ben nè mâ.
Pe parlä de cöse nêuve
Löda o vizio e chi o prommêuve.
Dio t’avvarde dä veitæ
Ch’a l’é roba da despiæ!
O ciû äze, o ciû ignorante
Paragonnilo con Dante,
Metti o birbo e l’impostô
A confronto do Segnô.
Maledisci chi profana
O sensâ de carne ûmana,
E spedisci a-i sette çê
Chi no n’ha nisciûn mestê.
