Lunaio Regiña 1887/Conseggi
| ←A critica moderna | Lunaio zeneize compilao da-o sciô Regiña & C. pe l'anno 1887 Conseggi a-o sciô Regiña |
Pontoalitæ→ |
Conseggi a-o sciô Reginn-a
Bocca a buscio, sciô Reginn-a,
Stanni ascozo in ta marscinn-a,
Særa l'êuggio e dormi ben
In to cuccio comme i chen.
Comme i fratti ceiga o collo,
Fa da sordo, fa da sciollo,
E li fermo e drîto in pê
Fa da pälo e da candê.
Se t’incontri quarche spïa
Comme o lampo scappa vïa,
E de l'arte do sciûsciâ
No ne dî nè ben nè mâ.
Pe parlä de cöse nêuve
Löda o vizio e chi o prommêuve.
Dio t’avvarde dä veitæ
Ch’a l’é roba da despiæ!
O ciû äze, o ciû ignorante
Paragonnilo con Dante,
Metti o birbo e l’impostô
A confronto do Segnô.
Maledisci chi profana
O sensâ de carne ûmana,
E spedisci a-i sette çê
Chi no n’ha nisciûn mestê.
Dà de l’ommo spiritozo
All’osceno, a-o scandalozo,
E decanta o parlâ mâ
Pe modello da imita.
Fa delungo bonn-a ciæa[sic]
A chi sa vortâ bandea;
Fa dûxento e mille inchin
A-o paggiasso, all’arlichin.
Ciamma, ciamma o camorrista,
L’intrigante, l’affarista,
O mercante d’opinion
Pe colonne da nazion.
Ciamma e Frini e Messalinn-e
Eleganti scignorinn-e;
Ciamma e donne emancipæ
Donne onæste, bonn-e moæ.
Ti veddiæ che prëxo e stimma
T’acquistiâ qualunque rimma,
Comme tûtti se daian
Pe accattate da Pagan!
Te mettian co-i libbri dotti
Di ciû splendidi salotti,
E co-a fascia tûtta indoâ
Ti sentiæ ciammate: boâ!
Se t’avesci o santo sdegno
D’avvilite a questo segno,
Manda in mille menissin
O tò vëgio chittarin!