Lunaio Regiña 1885/Mûxica Sacra

←I Marionetti

Lunaio zeneize compilao da-o sciô Regiña & C. pe l'anno 1885 Mûxica Sacra

Segnô, Ve lödo e Ve ringrazio!→

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

MÛXICA SACRA

---

No façço a critica
Di mûxicanti,
Ma l’ho co-a mûxica
Che salmi e canti
A rende comici,
A l'assascinn-a
Con o ballabile
E a cavatinn-a.

Fra scàe diatoniche
Trilli e gruppetti
Pe-o ciù sän d’Opera
Tûtti i mottetti,
Tûtte i antifone
Do Santo, Santo,
Con gräve scandalo
Do sacro canto.

Sento confondime
Röba da teätri
Con Credo e Kirie
E Gloria Patri,
O briöso e comico
Chi è ne-o Barbiere
Cö malinconico
Do Miserere.

Messa de requiem
Salmi da morti,
Sento cantâmeli
Con pianoforti,
Catûbbe, timpani,
Pinfai, flautin,
E piäti e triangoli
E sûnaggin.

Ne-o gräve e rigido
Venardì santo,
Che tûtto in lagrime
Finisce o canto,
Sc canta o Pascio
Tra scinfonïe
De palcoscenico
Che me fan rïe.

Benchè da mûxica
Ignore o gergo,
No sò persuâdime
D’ûn Tantum Ergo
Cantôu con regole
C’han tûtto o cô
Do Ballo in Maschera,
Do Trovatô.

No sô persuâdime
Comme in san Loenso
Prævi e canonici
C'han do bon senso
Cantan a-o cembalo
A trenodïa
Ciù lamentevole
De Geremïa.

No sò persuâdime
Nè mâ nè ben
Che sêunne l’organo
De Varsovien,
De marcie fûnebri
E militari,
Canti patriottici
E popolari.

Ma viva l’anima
De Pappa Lion
Che pin de spirito
De religion
O daiä o vattene
A quest’abûso
Da-i ciù fanatici
Cangiôu in ûso.

A costo e rischio
D’ëse paolotto,
Lödiæ quest’ordine
Dell’ommo dotto,
Do Pappa energico
Chi mette ûn fren
A tanto scandalo
Di vei cristien.

Se verbigrazia
Mi foïse in lê,
Sensa piggiâmela
Contro san Pê,
Tanto in çeimonie
Comme in cantâ
A-i primmi secoli
Vorriæ tornâ.

Tornieiva a-i metodi
De sant’Ambrêuxo
Che profanavimo
Con nostro sgrêuxo,
E ben glorlandome
D’ëse cristian,
Levieìva in seguito
Tanto baccan.

Meistri de mûxica,
Ve diggo un Ame
Se comme eretico
Voeì lapidâme,
Ve son d’ostacolo?
Brävi sûnnoeì,
Dæme do scettico,
Fæ comme voeì!

Rasccioeì da organi,
Cantanti d’oëgio,
Se fæ de smorfie
Pe mi l'è mëgio,
Sensâ ciù fämene
Da gëxa ûn ghetto
Piggiæve a læxina!
Tornæ a-o banchetto!