Lunaio Regiña 1885/Segnô, Ve lödo e Ve ringrazio!
| ←Mûxica Sacra | Lunaio zeneize compilao da-o sciô Regiña & C. pe l'anno 1885 Segnô, Ve lödo e Ve ringrazio! |
In Löde di Cappoin→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
SEGNÔ, VE LÖDO E VE RINGRAZIO!
Vivemmo in secolo
De civiltæ,
De vëa repûbblica,
De libertæ,
Che van i povei
Co-i ricchi a spazio?
Segnô, ve lodo
E ve ringrazio!
Se da statistica
Vortemmo i quaddri
No gh’è ciù bindoli,
No gh’è ciù laddri,
L’è do spionaggio
O mondo sazio;
Segnô, ve lodo
E ve ringrazio!
Ghetti e postriboli,
Zêughi proibii,
Da-o nêuvo codice
Son abolii
Pe fä che i scandali
No pagan dazio,
Segnô, ve lodo
E ve ringrazio!
Con vöxe libera
Se pêu parlä
Sensa pericolo
De no sconträ
Con Caio e Tizio
Nè con Pancrazio,
Segnô, ve lodo
E ve ringrazio!
I fratti ë moneghe
L’han rimpiazzæ
Con fä limoxina,
Con fä caitæ
Pe amô do proscimo
E no pe strazio;
Segnô, ve lodo
E ve ringrazio!
S’arve ricoveri,
Collegi e schêue
A benefizio
De teste vêue,
Schivando i metodi
De sant’Ignazio,
Segnô, ve lodo
E ve ringrazio!