Lezendia 1763

by Steva de Franchi

Lezzendia dro famozo combattimento seguîo ri 17. ottobre l'anno 1763... de Steva de Franchi

Primma ediçion anonnima e sença dæta.
A cançon a fu torna pubricâ con benben de modiffiche inte l'arecugeita "Ro Chittarin" do 1772.
Exemprâ conservao a Zena inta Çivvica Libraja Beio (lascito Enrichetta Raimondo 1979).

Ra mæ Muza a ra Zeneize,
Vœuggio un pô desgagginâ;
Perchè all'uso dro Paize^[sic]
A m'agiutte aora a cantâ
Ro famoso Castellin,
Ro terrô dri Algerin.

2
Quello Erroe degno d'istoria,
Chi s'è reizo in quest'azion
Immortale; e tanta gloria
O l'ha dæto a ra Nazion:
Quello bravo Castellin,
Ro flagello dri Algerin.

3
De Zerman a ro confronto (1),
De Vivian (2), de Cabanê (3),
Senza fâghe torto, o affronto,
O pœu stâghe ancora lê,
Ro famoso Castellin,
Ro terrô dri Algerin.

4
D'Ottobre l'ottavo giorno
Sarpò l'ancora, e sciortì
Da ro porto, e a mêzo giorno
Voltò prova, e poi partì;
Con bon vento a sò camin
Ro famoso Castellin.

5
Bon Vascello in ra Sestriña
Ciazza stæto fabricaò;
O squarsava ra mariña
A inscie veire incaminaò.
Comandante è Castellin,
Ro spavento dri Algerin.

6
Trentadoî l'è l'armamento
Pezzi de canon mezan:
Hommi o l'ha sætte e duxento
Da tegnî l'arma a ra man:
Ma ro bravo Castellin
Vâ per doî miria Algerin.

7
Croxe rossa in campo gianco (4),
Per Stendardo o l'erborò;
Bon Zeneize: e non me stanco
Mai de dîghe, e ghe dirò
L'immortale Castellin,
Ro flagello dri Algerin.

8
Vento in veira navegando,
Re træ Izore o scrovì
De Majorca (5), bordezando
Doppo dri œutto, o nœuve dì
Ro Famoso Castellin,
Ro terrô dri Algerin.

9
Dri dîsette ra matiña
Se descrœuve da lontan
Uña Quæra, uña Latiña:
Fin a sei crescendo van.
Guarda, e dixe Castellin,
Stemmo all'ærta! En Algerin.

10
Spallezzæ da uña Fregatta,
Çinque son Sciabecchi armæ
Vegnan drîti de regatta,
D'abordâ deliberæ;
Ma non temme Castellin
Quelli cani^[sic] d'Algerin.

11
Presto.. Allon.. Dæve recatto,
Miccie asseize.. A ro canon..
Piggie ognun senza sciaratto
Posto, e senza confuxion;
Femmo veì a sti Algerin
Quanto peiza Castellin.

12
Fœura ranci.. Impaggettæve..
Gente d'âto.. Añimo e cœu.
A combatte appareggæve,
Che vittoria çerta ancœu
Ve promette Castellin
De sti cani d'Algerin.

13
A ra voxe dro comando
Un silenzio ne sciortì,
S'andon tutti appareggiando
Ro sò posto ognun crovì
Con ro bravo Castellin,
Aspêtando ri Algerin.

14
Uña tenera parlata
Fæta a tutti presto e ben;
Un gran fœugo in cœu ghe sâta,
Ro coraggio a tutti ven.
Crian viva Castellin
Ro spavento dri Algerin.

15
Reciamæve a ra memoria
Boin Zeneixi a pendoron
Re Cadeñe (6), e ra Meloria (7),
E tant'atre cose ancon
De ciù grande e de ciù fin
Da fâ bæffe, a ri Algerin.

16
Ve sovêgne ro Levante (8)
Palestiña (8), e Neigro mâ (8),
E in quant'atre terre, e quante
Sta bandera foì ciantâ.
Ma finisce Castellin
Fœugo addosso a ri Algerin.

17
Son vexin, son tutti in giro.
Se fà fœugo de canon.
Doî Sciabecchi a bruxa tiro
Intr'e Sartie ro Risson
Bœuttan dentro, e Castellin
Fœugo cria a sti Algerin.

18
Fœugo de moschettería,
De granate, e de pistoin,
De pugnatte, e l'armería
Gianca zœughe, e ri spontoin.
Fœugo cria Castellin,
Sempre adosso a sti Algerin.

20
Tutt'atorno, e da ogni parte
Gh'eran Turchi arampinæ.
Da re antenne uña gran parte
In coværta eran buttæ,
Ma ro bravo Castellin
Taggia a pezzi ri Algerin.

21
Picossæ de ponta e taggio,
Teste, braççe in aria andon.
Intra e sciorti, ogni abordaggio
Peì, e pelle ghe lascion.
Viva viva Castellin
Ro terrô dri Algerin.

22.
Un infærno ghe pareiva
De gran fœugo, e ramadan;
Da ro fumme non se veiva
Nè vexin, nè da lontan.
Ma ro bravo Castellin
Sempre adosso a ri Algerin.

23.
Ro mâ, rosso compariva
Da ro sangue zà imbrattaò:
De buscagge o se croviva,
E d'attrezzi imbarassaò.
Ro canon de Castellin
Fracassando ri Algerin.

24.
Doî Sciabecchi ri ciù ardíi
Desmattæ se retiron;
E doî atri freschi, e uníi
A ra Nave s'arembon;
Ma ro bravo Castellin
Ghe fe fâ ra mesma fin.

25
Ra fregatta era de poppa
In battaggia appareggiâ;
Co un canon de mezapoppa
Castellin l'ha fracassâ.
Viva viva Castellin,
Ro terrô dri Algerin.

26
Uña canonâ de ficco,
A sciô d'ægua a l'ha buttaò
Un Sciabecco grosso a picco,
Che per œuggio o l'è passaò.
Viva viva Castellin
Ro spavento dri Algerin.

27
Saran morti setteçento,
Turchi, e forsi ancora ciù.
Ri feríi son quattroçento
Per portâ ra nœuva in zù,
Con ro resto dri Algerin
Dro famoso Castellin.

28
Douzze^[sic] morti, con quaranta
Dri feríi son ri Crestien.
Ra vittoria Zena canta,
Ra desfæta de sti chen.
Viva viva Castellin
Ro flagello dri Algerin.

29
Ro piaxeì, con l'allegría
Chi spiegâ pœu dra çittæ?
Renasciua, e rescioría,
Che ghe pâ l'antiga etæ,
In ro bravo Castellin
Ro tormento dri Algerin.

30
Ro Governo, e ro Senato
Con ri voti han decretaò,
Che a qualunque Magistrato,
Per Magnifico ciamaò
Sæ ro grande Castellin,
Ro terrô dri Algerin.

31
Han ri mæximi Collegi
Regalaò de monizion,
Con quarch'atri privilegi
De comando, e de baston
Ro famoso Castellin
Ro spavento dri Algerin.

32
Non me scordo ro Tenente (9)
Comandante i Granatê
De Paraxo, che valente
O fè ben ro sò mestê
Combattendo ri Algerin
Con ro bravo Castellin.

33
De sta celebre vittoria,
A ri figgi dri figgiœu
Che ne reste ra memoria
Fin a tanto che se pœu
Viva viva Castellin
Ro flagello dri Algerin.

Liveræga

.