 |
Questa pagina a no l'è stæta corretta. | |
Ra mæ Muza a ra Zeneize,
Vœuggio un pô desgagginâ;
Perchè all'uso dro Paize[sic]
A m'agiutte aora a cantâ
Ro famoso Castellin,
Ro terrô dri Algerin.
2
Quello Erroe degno d'istoria,
Chi s'è reizo in quest'azion
Immortale; e tanta gloria
O l'ha dæto a ra Nazion:
Quello bravo Castellin,
Ro flagello dri Algerin.
3
De Zerman a ro confronto (1),
De Vivian (2), de Cabanê (3),
Senza fâghe torto, o affronto,
O pœu stâghe ancora lê,
Ro famoso Castellin,
Ro terrô dri Algerin.
4
D'Ottobre l'ottavo giorno
Sarpò l'ancora, e sciortì
Da ro porto, e a mêzo giorno
Voltò prova, e poi partì;
Con bon vento a sò camin
Ro famoso Castellin.
