Laude zeneize/23

←XXII. Della Passion de Iesu Criste.

Laude zeneize do XIV sec. XXIII. Della passion de lo nostro Segnor Iexu Criste.

XXIV. De la passion de lo nostro Segno Ihesu Criste.→

ms. D.1.3.19 Bibl. Berio - ed. da V. Crescini e G.D. Belletti, Giornale Ligustico X, 1883
torna a-a lista di atri scriti

XXIII.
Della passion de lo nostro Segnor Iexu Criste.

Pianzi cum li ogi e cum lo cor
la passion de lo Salvao.

1.
Oimè, Zuè, cain renegai,
lo me fijor voi me levai,
et sun la croxe lo ihiavai,
si como ello fosse malfator.

2.
Oimè, fijor senza peccao,
sun la croxe voi sei ihiavao!

Or fosse da lo vostro lao
a partir cum voi lo dolor.

3.
Oimè, fijor me de bone aire,
voi si sei sorella e paire:
como romarà la vostra maire,
chi è soreta e senza fijor?

4.
Et Criste respoxe de la croxe,
cum la soa doce voxe:
o maire mia, non abiai tar dolor:
a Zoane e' te lasso,
e quello sea lo to fijor.

5.
Et Zoane evangelisto
chi pianzeiva cum lo cor tristo,
ello me pijà per maire,
et mi lo preixi per fijor.

6.
Voi morir, fijor,
voi morì o doce paire,
voi morì, spoxo de bon aire?
O doloroxa quela maire,
chi ve morir si bon fijor!

7.
O voi, chi passai per la via,
vegnine alla passion mia,
et si veirei la doya mia,
la quar e' veigo de lo mio fijor.

8.
Oimè, Zuè, a si gran torto
lo me fijor voi me l'avei morto!
Voi me faresi gran comforto,
se cossì morto voi me lo rendi.