Esopo Zeneize 1822/O Villan, e i sò Figgiêu

by Martin Piaggio

←A Rêusa, e o Spinon

Esopo Zeneize de Martin Piaggio O Villan, e i sò Figgiêu

A Societæ do Leon→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XXXII.

O Villan, e i sò Figgiêu.

Travaggiæ , dæve d'attorno,
Figgiêu cai, no ve stanchæ,
Un Villan dixeiva un giorno,
Ai so Figgi ammagonæ
Perchè o l’ea vixin a moî;
Figgi cai, stæme a sentî,
In ta villa, oppû nell'orto^[1]
Che ve lascio, gh’è un tesöu
Drento ascoso in gioje, e in öu,
No o vendei quando sö morto,
Per tanti anni l’hò çercôu,
Mi no sò o lêugo preciso
Dove l’aggian sotterrôu,
Ma ve serve questo avviso,
Co-a pazienza se o çerchieì
Forse un giorno l’attroviei.
Da per tutto semenæ,
Desfondæ, cavæ, sappæ,
No lasciæ un parmo de terra
Senza aveighe fæto guerra;

Morto o Poæ, tutti i Figgiêu
Non aveivan atro a coêu,
Che trovâ quello tesöu
Per spartîse e gioje, e l’öu,

Giorno, e nêutte travaggiavan
Da per tutto semmenavan,
Desfondon, cavon, sappon,
E un-na annâ doggia piggion;
No trovon mai ninte ascoso,
Ma sò Poæ fû ben virtuoso
D’insegnâghe avanti moî
A manea de fâ de l’öu,
Che o travaggio o l'è un tesöu,
Questo solo o pêu inricchî.

1. o in te quell’orto