Esopo Zeneize 1822/A Societæ do Leon

Da Wikivivàgna
Esopo Zeneize de Martin Piaggio
A Societæ do Leon
Zena, Stampaja Pagan, 1822 - Primma ediçion
e en stæti reixi con êu e ôu.
In notta e diferençe co' l'ediçion do 1846.


[p. 61 modifica]
FOA XXXIII.

A Societæ do Leon.


Un giorno un Leon feroce,
C’un Bêu, un-na Crava, e un Bæ
Fessan d’amô, e d'accordo
Insemme societæ,

Con patti de spartîse
Per quarta parte ognun
I guagni, o e perdie fæte,[1]
Nè se rostî nisciun.

A Crava, e o Bæ fen subito
Pe-i primmi un affaretto,
Piggiando un bello Çervo
Pë corne in to sorchetto.

[p. 62 modifica]

Fedeli in rende conto
Mandon presto a ciammâ
O Leon, perchè e vegnisse
E parti giuste a fâ;

Vegnì tutto affannoso,
E in aja grave o Leon,
Che o Bæ o trovò pe-i boschi
A fâ l’amô e o mincion.

O piggiò presto o Çervo
Co-e sampe, ch’o spartî
In quattro parti eguali,
Che o dividé così[2]:

A primma a tocca a mì
 O disse) e con raxon
Me servo mi pe-o primmo,
Perchè me ciammo Leon;

Me spetta ascì a seconda[3]
Per drito, e per dovei,
O drito do ciù forte,
Impaelo[4] se nö sei.

A terza poi pretendo
Pe-o grande eroe che son,
Chi ardisce toccâ a quarta
Me o mangio in t’un boccon.

Così[5] succede a-o mondo
A-i ommi, che imprudenti
Çercan d’imbarassâse
Co-i forti, e prepotenti.

  1. Tutti i profitti fæti,
  2. coscì
  3. segonda
  4. Ve o diggo
  5. Coscì