Due brocche de viovetta/Quadretti da-o vëo
| ←Fêugge de rêuza | Due brocche de viovetta de Quadretti da-o vëo |
Goldoni a Zena→ |
| ed. www.liberliber.it 2010 |
Unn'öa da Zena, manco, e pä lontan
chi sa quante, perché, lì, ti no senti
ni borboggio, ni fô, ni ramaddan,
biciclette, automobili, aççidenti:
ûn palassieto, co-i barcoin che dan
a mëzogiorno: – a casa di manenti
da fianco, ûn pö ciù in zù: de man in man
aggueita d'in sciä porta ûn, dui, treì foenti,
belli, sporchi, descäsi, mëzi nûi,
chêutti da-o sô, con di êuggi mäveggiæ,
pin de salûte, ardii, rosci boffûi:
ma se ti çerchi de fâghe ûnn-a frasca,
de dâghe ûnn-a gaggioâ, cöran dä moae,
bella, sann-a e robûsta ponçeviasca.
Bella, sann-a e robûsta, ch'a se ten
l'ûrtimo in scöso e a gh'é conta ûnn-a föa:
sciorte dä stalla con l'odô do fen
o mugogno annojôu da vacca möa:
o majo, comme fan i boîn paisen,
o l'é pe-a villa, e o sappa, o taggia, o pöa;
intanto dä cuxinn-a a-o naso ven
l'ödô do menestron chi é zà in sciä töa:
lê o l'arriva co-a sappa, cö badî,
co-a corba in spalla, e avanti o can chi baja,
e pä ch'o digghe: – a çenn[-]a, semmo chì!
stanco frûsto o no va manco all'ostaja:
mangian in paxe e van tûtti a dormî
che l[']é sûnnôu da poco l’Avemaja.