Due brocche de viovetta/Fêugge de rêuza
| ←Sotto voxe | Due brocche de viovetta de Fêugge de rêuza |
Quadretti da-o vëo→ |
| ed. www.liberliber.it 2010 |
Comme tûtto a-o mondo passa!
a-o levâ do sô ti é scioia
e a-o tramonto ti é zà passa,
povea rêuza, e speronsia:
presto ven chi fa man bassa
e.... no se ne parla ciù....
comme tûtto a-o mondo passa,
e a bellessa e a zoventù!
E tò fêugge che s'arvivan
innamoæ a-o baxo do sô,
e tò fêugge cäe che impivan
tûtto in gïo l'äja d'ödô,
quelle fêugge che lûxivan,
che brillavan de rozâ,
tûtt'assemme croavan, moîvan
sensa vive ûnn-a giornâ:
Croavan, moîvan:.... povee fêugge
spanteghæ chì pe-o sentê,
no gh'é ciù nisciûn chi e vêugge,
ë streppellan tûtti i pê;
no gh'é figgia che e acchêugge
passeggiando in to giardin:....
croavan, moîvan, povee fêugge
visciûe appenn-a ûnn-a mattin!
Coscì e mæ speranse ho visto
in t'ûn attimo andâ via:
Son chì stanco, fûto, tristo,
päo ûn lûmme quando o spia….
Comme tûtto a-o mondo passa,
e a bellessa e a zoventù!
scì, ch'a vegne a fâ man bassa
e..... no se ne parle ciù!....