Chittarin zeneize 1881/95

by Martin Piaggio

←Sunetto

Chittarin zeneize de Martin Piaggio Lettia - a so figgio

Cançon→

Lettia do 23 zenâ 1840 a-o figgio paddre Fulgençio

LETTERA ¹

Cariscimo Fulgenzio, a-i vimitrei zenâ
Ne-o salon de San Zorzo,² primma d’andá a disnâ.

In primis et ante omnia, tò barba ³ sta assæ mëgio,
   Cessò a frevetta e a tossa, coscì cessasse o vëgio...⁴
O l'é ciù allegro, o ciarla, o se va affiando o dente ⁵
   E o saeiva zà guarïo, sensa quello serpente!...⁶
Aspëtavo tò lettere, secondo ti m’hæ dito,
   Ma ti n’hæ scrito ninte.. . bravo! per fâ ciù fïto.
Spero che a tò salûte in mëzo a-e Benedette,⁷
  Zazzûin, legûmmi e cöi, a sä de ciù perfette,
E che a quest’ôa, cantando comme l'öxello in gaggia
   E dipinzendo a sguasso, ti sæ ûn Raffaello in paggia.
Se mai ti fesci di angei, no fâ müri de mû ⁸
   E, se ti fæ de nûvee, no fâ sc... de c..,
Dunque ti fæ scappâ d’in gëxa finn-a a Santa ⁹
   E o rapallesco popolo voî soli o ve ghe cianta.
Diggo coscì per rïe, bûrlo perchè so ben
   Che o figgio de Reginn-a o sa fâ e cose ben,

E che o l’ha ûn grande impegno de fâ lûxî e spiccâ
   De San Fransesco o tempio, per fâlo ciù avoxâ.¹⁰
Se in giorno de domenega prinçipiasse e funzioin,
   Vegniæ a mangiâ ûn spallon a-i fratti Cappûççin.
Dimmelo per mæ regola, zacché vegnîghe spëo,
   Riveiscime o guardian e tûtte e barbe ¹¹ a rëo;
Divertite, sta allegro, e prega per tò poæ,
   O Çê te benedicche! t’abbrasso.

Martin Bæ.