Chittarin zeneize 1881/77

by Martin Piaggio

←Lettia

Chittarin zeneize de Martin Piaggio Scherço - pe 'n regallo de çinque tregge

Sunetto→

SCHERSO¹

Che regallettin da amixi
Che m’ha fæto o sciô Çiçeon! ²;
Çinque tregge co-i barbixi,
Belle, grosse e de stagion.

Ringraziando a sò bontæ,
Ghe diö comm’i ho mangiæ;
Con Tëxinn-a e i mæ figgiêu.
Ûn pâ a-o piatto han guägno a lite
Contro ûn tondo de raviêu;
Atre due son stæte frite,
E n’han tiôu sciù proprio o chêu.

Scià indovinn-e ûn pö a ciù bella
Comme a l’andò a terminâ?.....
A l'é stæta condannâ
Comme San Loenso... ä grixella...

Oh che gûsto prelibôu!
Che squixito e bon boccon!
Finn-a e rèsche ³ s’é mangiôu,
E e dïe se lecchemmo ancon.....

Ah beneito chi e pescò,
Chi e mandò, chi e celebrò!...⁴
Ghe vorrieiva o dûplicato...
Ghe son servo, sciö avvocato.