Chittarin zeneize 1881/79

by Martin Piaggio

←Scherço

Chittarin zeneize de Martin Piaggio Sunetto

Sunetto→

pe-o maiezzo da Mariña Toraçça co-o Loigi Botto nevo de l'aotô

SÛNETTO¹

Ûnna rêusa accûggeita stamattin,
Bella, frescosa, e ancon tûtta appommâ;
Ûn giglio gianco comme ûn armellin,
Chi ha tûtte e fêugge pinn-e de rosâ.²

Questi fiorî levæ d'n to giardin,
Per man d’Amô, da-a bella Dea do mâ,
Ve presenta, o sposoeì, barba ³ Martin,
Zà che atra cosa ûn poeta no pêu dâ.

A rêusa a l'é o ritræto in miniatûa
De Marinn-a e a descrive o sò pûdô,
A grazia e l'avvenensa da figûa.

Finze de Luigi a fedeltæ l’arbô
Do giglio intatto, e dixe a lö Natûa,
Mi ho fæto, ma anchêu v’ûnisce Amô.