Chittarin zeneize 1881/81

by Martin Piaggio

←Sunetto

Chittarin zeneize de Martin Piaggio Sunetto

Sunetto→

pe-o maiezzo da Loiza Marcheiza co-o Gioxeppe Botto nevo de l'aotô

SÛNETTO¹

Sotto ûn trono de perle e de rûbin,
De rêuse e de ganêufani astregôu,
Stava Imeneo pensoso, contorniôu
Da ûn sciammo de Genietti e d’Amorin;

Se ghe presenta quello biricchin
D’Amô co-i äe taggiæ, tûtto affannôu,
Sens’arco e sensa frecce, desbindôu,
Allegro, pin de frasche e d’axillin.

Son chì, o disse, co-a mëgio de mæ impreise,
Degna de ti e do figgio de mæ moæ...
Imeneo scrollò e spalle e o se n’offeise;

Ma quando o ghe mostrò sto mascarson
I chêu do Pippo e Giggia in öu lighæ,
O l’abbrassò, e o ghe disse: Ti hæ raxon!