Cava in to remoin 1930/Ö LEON E-Ö SCIMIOTTO
| ←Ö zanetto e ö babollo | In to remoin de Ö leon e-ö scimiotto |
A vorpe banchëa→ |
Ö LEON E-Ö SCIMIOTTO
Ûn leon serrôu in gaggia
da ûn potente domatô,
o pensava, pin de raggia,
dö deserto a-o cädo sö.
– «Ö sô cädo dö deserto,
giorni mae de libertae,
là passae in campo averto
da vëo re di animae.
Belle antilope graziose,
tanto, bonn-e da mangiâ,
carövann-e nomeröse
c'ho assatôu senza tremâ;
chi ve cianzo tûtto ö giorno,
ve arregordo con magon,
e 'ste sbäre c'ho d'intorno
fan ciû odiösa a mae prexon.
Ma che serve l'angösciame[1]
a obbedî son condannôu;
sâtâ ö çercio pe guagname
ûn pö d'ase derenôu.[2]
Bella fin pe ûn gran sovrano:
fâ ö paggiasso pe mangiâ!... » –
Ma ûn scimiotto mezo nano,
che o sentiva mogognâ
o gh'à criôu con mala grazia:
– «Lascia a boria pe doman,
no l'é poi 'na gran disgrazia
per ûn re guagnase ö pan!» –