Bolle de savon/Quello che dixe o Balilla de Portoja
| ←O Cappûççin | Bolle de savon de Quello che dixe o Balilla de Portoja |
O gïo di presepï→ |
| www.liberliber.it 2011 |
I.
Che no ghe segge moddo ni manëa
de poeì desentegâ questa genïa?
A ven in casa nostra, a se gh'annîa,
e tutti ghe fan röso e ghe fan cëa.
A poco a poco a brûtta pipinëa
a diventa de cà, comme a spassoia:
cöse a fà?... cöse a tesce?... cöse a fia
a Zena, in ti dintorni e pe-a rivëa?
Parmo a parmo conoscian o terren;
strazetti, scorsajêu, passi, sentê,
e annastan dappertûtto comme i chen:
affoinae, se fan d'öu; trêuvan moggê....
ma son sempre i tedeschi:... o! no sae ben
piggiâli torna a casci in to panê?....
Comme gh'é l'erba gramma in mêzo a-o gran
e in te ûn costo de rêuze gh'é o scorpion,
comme ven in sce ûn corpo bello e san
o ciavello o vespâ, brigoa o bûgnon,
in mëzo a voî, popolo forte e bon
che con orgoglio o sà d'ëse italian,
gh'é a vipera, gh'é o fuccao, gh'é o birbon
che co-i marchi o scimiotta Vespasian.
Vëgia Portoja, ti no hae ciù de sasci
pe sto vile bastardo sensa onô? -
a pensâghe me ven torna i fûmmasci!
Ma invece de ciappâ sto traditô
e impacchettoû mandâmelo a Marasci....
voeì scommette che o fan commendatô?
A-i sò tempi «messê Poro Foggetta»
c'o l'aiva, se pêu dî, e rimme in scë dïe,
zeneixi! - o dïva - femmo de «garïe»
se da-i corsae noî voemmo a casa netta.
Messê Poro, sta razza maledetta
l'emmo sempre pe-a casa, e a se ne rïe,
e no gh'é ciù ûn Balilla chi ghe tïe:
sott'aegua, intanto lö ne fan gambetta.
En dappertûtto; in mëzo ä nostra vitta,
in ti negozï, a Banchi, in lögia, in porto....
Che Zena a l'agge proprio a calamitta?
che seggian tûtti nesci? o tûtti guèrsci?
Ah, messê Poro, se no foisci morto!...
daesci l'allarme voî, co-i vostri versci.
Ho mugugnôu da bon zeneize, ho faeto,
comme se dixe, fêugo de me legne;
ho spûôu 'n pormon, l'anima o chêu, o fîgaeto
pe bollâ a vivo çerte facce indegne. -
No parlemmone ciù; quello ch'é staeto
quarcosa, a-o manco a tûtti digghe e insegne;
no parlemmone ciù do brûtto ciaeto
pe no rompî o cavagno in te vendegne.
Viva l'Italia! - o chêu de Zena o trilla
e o fà o peligordin; e mi renascio
e ûn pulëo me pä d'ëse sensa brilla.
Ma se gh'é chi vêu fâ quarche sconquascio,
se gh'é ancon.... m'intendei.... zûo da Balilla
che saviö sempre allivellaghe ûn sascio.
1916-1918.