Bolle de savon/O gïo di presepï
| ←Quello che dixe o Balilla de Portoja | Bolle de savon de O gïo di presepï |
O Parmê→ |
| www.liberliber.it 2011 |
Da vëgia Zena no gh'é anchêu tosto ciù ninte;
o quaddro o l'é cangiôu, cangiôu disegno e tinte:
dove gh'ëa di caroggi, lûveghi sporchi streiti,
dove o sô o so veddeiva da-i lûxernae in scï teiti,
aoa gh'é de gren stradde pinn-e de lûxe e d'aja
d'ûn vanni e vegni che squaexi squaexi o l'inaja:
di casoîn vëgi o posto piggian de man in man
palassi neûvi, teatri, bar e cafè sciantan....
(Me sovven d'ûn barcon - cae memoje! - streito, èrto,
dove mi zoenottamme, ûn giorno aiva scovèrto
tra ûn vaso de ganêuffani e ûnn-a pûgnatta rotta
ûn faccin che o me fava stâ de giornae lì sotta!)
Tûtte e artûe comme a-o magico colpo d'ûnn-a bacchetta
han cangiôu naso e bocca: - l'é andaeto zù a casetta
rûstega do manente; - con l'orto l'é scentôu
l'oiva, a sexa, l'amàndoa, o rianello e o fossôu:
no ciù cascinn-e, no ciù campi, nì strazetti;
ma giardin, stradde larghe, castelli e castelletti;
no ciù l'odô de fen, no ciù a spûssa de bêuza....
ne manda a sò fragransa o limonetto e a rêuza.-
Dunque da vëgia Zena no gh'é tosto ciù ninte,
o quaddro o l'é cangiôu, cangiôu disegno e tinte.
Sento ûn mugugno: dixe: ti n'é promisso o gïo
di presepï; ma dove t'êu finî con st'asbrio?
Ghe vegno fito, subito; ghe vegno.... ma pe dive
c'o no l'ha ciù sto gïo quelle antighe attrattive
da campagna, da villa, do sentê, do lontan:
i cappuççin? - ma allöa paivan zà fêua de man;
Madonnetta, San Barnaba, Oeginn-a?... paivan äti:
gh'andemmo anchêu cö tram, ghe semmo in quattro sati.
Alloa se fava o gïo, coscì, pe passâ a gnàgnoa,
pe levâse ûn pö a muffa da-o chêu, beivine ûnn'amoa,
pe no sentî o fracasso, l'invexendo de Zena,
pe vive almeno ûn giorno liberi, sensa gena,
pe vedde do sarvaego, pe mesciâ e gambe e scin
pe piggiâne ûnn-a preiza da-o fratte cappuççin.
A scena a n'é ciù quella, - ma i zeneixi ghe van
pe vedde e figurinn-e belle do Maragian,
o Gelindo, i Remaggi, a paisann-a co-a brocca,
o povieto, o paesaggio faeto con l'erba cocca. -
Pe mi, me piaxe quello, largo treì, äto ûn parmo,
e che l'é chì in ti fraveghi, da-o Gaggin faeto in marmo.