Bolle de savon/O Parmê

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
O Parmê
www.liberliber.it 2011
[p. 52 modifica]
O Parmê

Sempre coscì! - a l'é storia
vëgia... e storia do giorno:
anchêu te cantan gloria,
te fan a rionda intorno;
t'ë misso in sce l'artâ,
portôu in parma de man:
all'occio! e dagghe a tâ....
comme a l'andiâ doman?

Scrolla a ogni vento a fêuggia,
presto s'asmorta o fôu:
o laete o vegne schêuggia,
e piggia o vin l'axôu:
se da che manche a diccia,
porte e barcoîn se saere?
e... te salûo, Baciccia,
ben ch'a te vadde en gnaere. -

O va a Gerusalemme
a cavallin d'ûn äze:
a gente, comme scemme,
sciortan da tûtte e cäse

[p. 53 modifica]

con parme e ramme d'oiva:
ö vêuan vedde e toccâ
sbraggiando: viva! viva!...
diman, comme a l'andiâ?

Avvoxaeme e sö dûxe!
ma sempre in apprenscion,
che doppo tanta lûxe
ven spesso o lampo e o tron;
doppo i sbraggi e l'osanna,
doppo l'oiva e o parmê,
e spinn-e, e gnaere, a canna
e a croxe con l'arfê. -

53