Bolle de savon/Menû
d'ûn disnâ a Bûsalla in ta villa DAVIDSON
Pe addesciâve l'appetitto
(ma so zà ch'o l'é ûn de ciù)
comme prologo a sto pitto
ve presento chì o menû.
E se o prologo o finisce
con a vostra approvazion,
e ätre scene passian lisce
fin che vegne zù o telon. -
Pe menestra ûn pö de broddo
bon, con quattro tortellin...
o me pâ l'unico moddo
pe poeì mettise in cammin.
Ven apprêuvo ûn pollastrotto
vegnûo grosso in capponëa,
gianco comme o livio; - ûn motto
tûtto grascia: - faeghe cëa!
Pescio poi co-a majoneize
fresco ancon comme l'argento:
ûn pittâ tûtto zeneize...
faeghe röso, daeghe drento!
Manzo, all'ûrtimo, piggiôu
fêua de Zena, in t'ûnn-a stalla....
(no dî ninte, l'ho sfrôuxiôu)
faeghe scialla!... scialla!... scialla!...
Cöse diesci se ghe föse,
pe poeì dî: dulcis in fundo,
dö-trae fette de pan doçe?...
Sae o menû completo e riondo.
Ben, ghe son: gh'é ascì (no vêuggio
chì fâ a rêua comme ûn bibbin
con dî che o me costa ûn êuggio)
ma gh'é ascì do piaxentin,
con contorno d'ananasse,
noxe, amandoe, peì martin,
ûghe fresche ed ûghe passe:
pe ascädâ gh'é do bon vìn,
gianco, neigro, amäo, cö lecco,
pernixôu, döçe, nostrâ....
sciù appussaeghe tûtti o becco,
e a l'andiâ comme a l'andìâ.
Pe finî poi se destappa
quello tale chi ha l'asbrïo...
se fà o brindixi... se lappa...
se và all'orsa... L'é finïo. -