Bolle de savon/In to stûdio do pittô
| ←Careghetta d'öu | Bolle de savon de In to stûdio do pittô |
Menû→ |
Là in äto, e in t'ûnn-a cupola
do palasso da Borsa
(ah, poeighe andâ c'ûn xêuo
a saeiva ûnn-a risorsa!)
quande se gh'é, in t'ûn attimo
ve s'arve ûnn-a gran scena:
çê, monti, mâ, miracoli,
gexe, palassi… - Zena!
loggette, giardin pènsili,
bersò, ville, terrasse;
e due rivee c'han fascini
comme due belle brasse;
lunxi, da-o mâ, ûnn-a nûvia,
ûn vello de vapori
ûn insemme fantastico
de lûxe e de colori:
colpo d'êuggio magnifico
chi piaxe e chi demöa,
se stà lì comme in estaxi
a contemplâ pe ûnn'ôa
quaexi pe l'incateximo….
de chi?.. d'ûnn-a sirena?
No! - sta potensa magica
a n'ha che ûn nomme: - Zena!
Pä faeta questa cupola,
pä faeta sta gran vista
pe dave o xêuo dell'aquila
ä mente d'ûn artista:
defaeti ûn giorno «o Griffo»
ricco do sò pennello,
o se pösôu da fuccao
lasciù, comme ûn oxello,
in mëzo a ûnn-a faraggine
d'anghaesi, ciù che missi
cacciae chi e là sens'ordine,
- cartoin, disegni, schissi,
stöfe, tappeti, mobili,
fottezzi, cavalletti,
stampe de tûtti i secoli,
stûdii, libbri, bozzetti -
corrindo dietro ä ciòccioa,
a-i recîammi dell'Arte;
da-e cricche e da-e combriccole
tegnindose in desparte;
e ava e cocchetto o piggia
da-o çê, da-o mâ, da-o sô
o bello e o bon; - cioè l'anima
do quaddro: - o lûmme e o cô:
Teje, acquarelli, tempere,
che son capolavori
pe l'esprescion, pe-a linea,
l'impasto di colori:
ed ecco intrando, sûbito
o «cian de Sant'Andria:»
vedûta nostra tipica;
ciù a piaxe ciù a s'ammïa:
demöa, fucciàra, stûdio,
ûnn-a cösa da ninte...
ma disegnâ con scrupolo,
con vivessa de tinte:
mi davanti a quest'angolo
de Zena, a sto recanto,
staggo, zeneize autentico,
comme a biscia all'incanto.
In sà e in là quaddri storici,
e sae quaexi pe dive
che chì e figûe, no esagero,
parlan, mescian, son vive:
colore cädo a-o solito,
çernûo sempre o concetto;
chì, dieiva Michelangelo,
gh'é a man e l'intelletto.
Han da l'artista e pagine
da Storia nêuva luxe:
sto chì o l'é ûn nostro console,
quello là ûn nostro duxe:
de regni e de repubbliche
ommi staeti a-o timon
(ûn Assereto, ûn Caffaro
ûn Doja, ûn Napolion)
vegnan in palcoscenico
e da ribalta a-i lummi
a fâ torna ûnn-a reçita
co-i sò antighi costûmmi:
gh'é ambiente, scena e storica
veitae, gh'e vitta e cô...
e ciocca e moen o pubblico
e o ciamma fêua l'autô.
Ma mi tescio de scillabe
e fïo di brûtti versci:
e me parolle en lûveghe,
e i mae colori en spersci:
no vêuggio fâ ûn catalogo
freido chi se descûxe,
manco avvoxâ mi vêuggio
ûn chi é za faeto dûxe.
Se ven che pe ûn miracolo
goagne in sciö semenajo,
vêuggio ëse ûn ommo pratico,
no o solito lûnajo;
vêuggio dî a-o Griffo: ciappime
carton, pappê de strassa,
teja, aççidenti e bêuttime
zù do gran cô, spegassa,
cö tò pennello magico
dipinzime sta scena,
e duî cäi nommi scrivighe
poi sotto: «Griffo - Zena.» -