Bolle de savon/Quadretto zeneize
| ←Menû | Bolle de savon de Quadretto zeneize |
O Grande Ortoan→ |
Co-a parolla no l'é façile
dâ o colore da giornâ,
l'invexendo da vigilia,
rende a carma de dënâ,
a poexia de nostre case
co-ûn savô tûtto zeneize,
segge a casa do marcheize,
segge a cà do popolan.
O l'é quaexi tempo perso
voeine fâ ûn pö de pittûa;
no s'otten co-a rimma e o verso
che ûnn-a cösa freida e scûa:
a parolla, a rimma, a strofa
no ne fan vedde l'ambiente,
no ne pêuan dipinze a gente,
o vëo quaddro no ne dan.
Mi sto quaddro, ä mae manëa,
tio zù con due pennellae:
a vigilia a l'é ûnn-a fëa;
gran sûssûro pe-a çittae:
ogni bocca a l'ha ûn augûrio
ûn salûto, ûnn-a parolla...
ma se pensa ä cassarolla,
a-o confeze do bibbin.
Dappertûtto ûn gran borboggio,
dappertûtto ûn gran da fâ;
ogni stradda, ogni caroggio
pin de ciaei comme ûnn'artâ:
chì se canta, là se sbraggia,
chì se çenn-a, là se beive...
a finî o mae quaddro a neive
ghe vorriae doman mattin.
Doman, carma sensa ûn schêuggio,
doman, festa da famiggia;
o pan doçe con l'öfêuggio
e pe-o brindixi a bottiggia
ch'a l'ha ciù de mëzo secolo;
e ûn remescio de figgiêue,
de masccetti, zenei, nêue
in gïo a chi l'é o bordonâ.
Bordonae de case, santi
vëgi avansi do passôu,
operai stanchi, viandanti
ch'hei zà tanto camminôu,
no scentae! - de nostre case
seì l'öfêuggio e a ramma d'oîva,
seì l'amô, seì sempre a viva
sciamma do nostro fogoâ!....