Bolle de savon/In morte do roscignêu

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
In morte do roscignêu
[p. 83 modifica]
In morte do roscignêu

Se sentiva d'ogni tanto
ûnn-a voxe doçe, ûn son,
ûn gorghezzo, ûn trillo, ûn canto
pin d'amô, pin de pascion;
se beveiva quella mûxica
ch'a l'andava drita a-o chêu,
e se diva, comme in estaxi;
canta... canta... roscignêu!

Lazzú, a Barga, in ta campagna
o s'ëa faeto ûn pö de nïo,
- nïo da poeta. - Che cuccagna!
paxe e verde tûtt'in gïo;
e da quella solitûdine,
e da mezo a quelle scioî,
e sò verso malinconico
o ne fava poi sentî.

O sò verso o l'é ûn insemme
d'öu, de perle ben montae;
a sò voxe pä ch'a tremme,
pä ch'a cianze e a ciamme a moae;

[p. 84 modifica]

o cantava, poveo Pascoli,
comme chi ha ûnn-a spinn-a a-o chêu:
tûtti se diva sentindolo:
cianzi, canta.... roscignêu!

Canta ancon... sempre!... i tò canti
son pe noî stelle do çê,
e son goççe de diamanti,
e son fiori in sciö sentê;
i tò canti san de lagrime
ma fan tanto ben a-o chêu....
Cöse importa e nostre làstime?
cianzi... canta... roscignêu!

D'ogni tanto se sentiva
ûnn-a voxe doçe, ûn son....
Tûtt'assemme a voxe a moîva
sensa terminâ a canson:
ven l'annunzio comme ûn fûlmine
e o fà strenze a tûtti o chêu...
- Canta ancon!... - ma sghêua in te nûvie,
sghêua lontan o roscignêu....